Հովհաննես Բաչկով. Ամեն ինչ տանում է դեպի Տոկիո-2020
23:22 27 փետրվարի, 2017Հայկական բռնցքամարտը երբեք էլ հետընթաց չի ապրել: Եթե չլինեն մրցավարական անարդարությունները, մենք մրցաշարերից միշտ էլ մեդալներով կվերադառնանք:
Այս մասին NEWS.am Sport-ի թղթակցի հետ զրույցում ասաց բռնցքամարտիկ, Ռիո-2016-ի մասնակից Հովհաննես Բաչկովը: Նա փետրվարի 26-ին նվաճել է Սոֆիայում ավարտված «Ստրանջա-2017» միջազգային մրցաշարի հաղթողի կոչումը 64 կգ քաշային կարգում:
Հովհաննես, երկար տարիների դադարից հետո քեզ հաջողվեց Սոֆիայի մրցաշարում ոսկե մեդալ նվաճել: Բարդ տրվե՞ց հաղթանակը:
Հեշտ տրվող հաղթանակներ չեն լինում: Բարդ էր: 5 մենամարտ անցկացրեցի, 5 մրցակիցներս էլ շատ ուժեղ էին: Ջանասիրաբար աշխատել էի, լավ մարզավիճակ ունեի, հոգեպես էլ պատրաստ էի, այդ պատճառով կարողացա բոլորին հաղթել: Չեմ առանձնացնի մրցակիցներիցս որեւէ մեկին: Իսկապես ուժեղ մրցաշար է: Ուրախ եմ, որ կարողացա ոսկե մեդալ նվաճել: Ռիոյից առաջ Վենեսուելայի միջազգային վարկանիշային մրցաշարում եւս ոկսե մեդալակիր դարձա, այստեղ նույն տրամադրվածությամբ ռինգ դուրս եկա հաղթանակի ակնկալիքով:
Հավաքականի մարզիչ Դավիթ Թորոսյանը նշել է, որ քո հաղթանակը հայկական բռնցքամարտի ավանդույթները եւ հաղթանակները վերականգնելու հույս է ներշնչում: Դու նույնպե՞ս այդպես ես մտածում:
Այնպես չէ, որ մեր բռնցքամարտը այս հաղթանակից առաջ հետ էր գնացել, կամ հետընթաց էր ապրում: Հայկական բռնցքամարտը միշտ էլ իր գագաթնակետին է եղել, ուղղակի այլ հանգամանքներով պայմանավորված, մրցավարական անարդարություններ են միշտ եղել, որոնք անբացատրելի են, այդ պատճառով էլ մեդալներ չենք նվաճել: Եթե այս հանգամանքները վերանան, մենք բռնցքամարտում միշտ էլ մեդալներ կունենանք. բռնցքամարտը մեր հայկական մարզաձեւն է:
Ռիո-2016-ից հետո հավաքականի անդամներ Նարեկ Աբգարյանն ու Արամ Ավագյանը տեղափոխվեցին պրոֆեսիոնալ ռինգ: Դու ե՞րբ ես փորձելու ուժերդ պրոֆեսիոնալում:
Երեւի այս տարի կսկսեմ, բայց դեռեւս հստակ չեմ կարող ասել՝ երբ եւ ինչպես: Կուզենայի Եվրոպայի եւ աշխարհի առաջնություններում բարձր արդյունքներ գրանցել, նոր պրոֆեսիոնալ ռինգ մտնել: Այսքան տանջվել, քրտինք եմ թափել, չեմ ուզում առանց Եվրոպայի, աշխարհի մեդալների սիրողականից դուրս գալ:
Կպատրաստվե՞ս Տոկիո-2020-ին:
Ամեն ինչ տանում է դրան: Կփորձեմ զուգահեռ երկուսում էլ լինել. սիրողականում բարձր արդյունքներ՝ մեդալներ նվաճել, պրոֆեսիոնալում ուժերս փորձել: Մինչեւ 15 մենամարտի հնարավորություն ունեմ պրոֆեսիոնալում, որպեսզի զուգահեռ հանդես գամ նաեւ սիրողականում:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.