Արմեն Մկրտչյան. Արայիկ Բաղդադյանը շատ հարցերում կարող է օգտակար լինել

23:09   17 փետրվարի, 2017

Երեւանում մեկնարկած ազատ ոճի ըմբշամարտի Հայաստանի առաջնությանը ազգային թիմի նախկին գլխավոր մարզիչ Արայիկ Բաղդադյանը հետեւում էր որպես հանդիսական:

Հայաստանի հավաքականի նորանշանակ մարզիչ Արմեն Մկրտչյանը, ով առաջնության գոտեմարտերին հետեւում էր Հայաստանի ըմբշամարտի ֆեդերացիայի ղեկավարության հետ, NEWS.am Sport-ի թղթակցի հարցին, թե Արայիկ Բաղդադյանն ինչ կարգավիճակ է զբաղեցնում մարզչական շտաբում, այդպես էլ չհստակեցրեց:

«Արայիկ Բաղդադյանը միշտ կարող է լինել հավաքականում: Բոլորս մի թիմի անդամ ենք: Նա շատ հարցերում կարող է իր անցած ուղիով օգտակար լինել ինձ, մարզչական շտաբին, հավաքականին: Նա ամեն տեղ կարող է լինել՝ մեծահասակների հավաքականում, երիտասարդականում կամ պատանեկանում: Մարզչական շտաբը չի փոփոխվել, բոլորն էլ կան, բոլորս էլ միահամուռ աշխատելու ենք: Իմ թիմում բոլորը պետք է աշխատեն միասին: Ճիշտ է՝ ես եմ որոշում, թե ով պետք է աշխատի իմ գլխավորած թիմում: Ունենք հավաքականի երկրորդ մարզիչ, կլինի նաեւ երրորդ օգնական: Բոլորս պետք է աշխատենք մի նպատակի համար: Իսկ Արայիկ Բաղդադյանը մեզ շատ հարցերում կարող է օգտակար լինել»,- ասաց Արմեն Մկրտչյանը:

Հիշեցնենք, որ մրցումային առաջին օրը Հայաստանի չեմպիոններ դարձան Գարիկ Բարսեղյանը (57 կգ), Նարեկ Սիրունյանը (65 կգ), Գրիգոր Գրիգորյանը (74 կգ) եւ Գեւորգի Կետոեւը (97 կգ):

Լուսինե Շահբազյան



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.