Դավիթ Թորոսյան. Առաջիկա մրցաշարերի նպատակը փորձ ձեռք բերելն է
22:51 13 փետրվարի, 2017Բուլղարիայի մայրաքաղաք Սոֆիայում կայանալիք Ստրանջայի մրցաշարին կմասնակցեն Կարեն Տոնականյանը (60 կգ), Հովհաննես Բաչկովը (64 կգ), Վլադ Մարգարյանը (69 կգ):
Այս մասին ասել է բռնցքամարտի Հայաստանի հավաքականի նորանշանակ գլխավոր մարզիչ Դավիթ Թորոսյանը NEWS.am Sport-ի թղթակցի հետ զրույցում:
Հիշեցնենք, որ բնռցքամարտի Հայաստանի հավաքական այս օրերին ուսումնամարզական հավաք է անցկացնում Երեւանում։ Թիմը նախապատրաստում է փետրվարի 20-27-ը Սոֆիայում կայանալիք մրցաշարին։ Չնայած մրցաշարին մնացել են հաշված օրեր, հավաքականի նորանշանակ մարզիչւ դեռեւս չի կողմնորոշվում թիմի կազմի հարցում։
«Այդ երեք մարզիկների մասնակցությունն է հստակ, մյուսները դեռեւս վերջնական հայտնի չեն։ Նրանցից մի քանիսի հարցը կապված է զինծառայության հետ, հայտնի չէ՝ նրանց թույլ կտան երկրից դուրս գալ, թե ոչ, ոմանք էլ վնասվածքներ ունեն։ Արամ Ավագյանը եւ Նարեկ Աբգարյանը բաց կթողնեն այս մրցաշարը, քանի որ երկուսն էլ պրոֆեսիոնալ մենամարտ ունեն փետրվարի 25-ին։
Այս եւ մյուս մրցաշարերի նպատակը դեռեւս փորձ ձեռք բերելուն է միտված։ Հավաքականից ոմանք փորձառու են, բայց երկար ժամանակ չեն մենամարտել եւ նրանց պետք է «խաղի» մեջ մտցնել։ Մի քանի երիտասարդներ էլ կան. ցանկանում եմ նրանց փորձել այս եւ մյուս մրցաշարերում, որպեսզի հետագա մեր անելիքները պարզ լինեն»,- ասաց Դավիթ Թորոսյանը։
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.