Փարիզում մեկնարկած հունահռոմեական ոճի ըմբշամարտի միջազգային մրցաշարի առաջին օրը հաջող էր Հայաստանի ներկայացուցիչների համար:
Կարապետ Չալյանը (75 կգ) եւ Մաքսիմ Մանուկյանը (85 կգ) դարձան ոսկե մեդալակիր, իսկ Ռաֆայել Ալեքսանյանը (71 կգ) արժանացավ բրոնզե մեդալի:
Մաքսիմ Մանուկյանը մեկնարկային գոտեմարտում 8:0 հաշվով հաղթեց լեհ Տադեուշ Միխալիկին, իսկ կիսաեզրափակիչում ուժեղ գտնվեց ղազախ Ազամատ Կուստաբաեւից՝ 7:0: Եզրափակիչում Մաքսիմը 4:2 հաշվով պարտության մատնեց հունգարացի Էրիկ Սիլվասիին եւ գրավեց առաջին տեղը:
Կարապետ Չալյանը պայքարը սկսեց 1/8 եզրափակիչից եւ, հաղթելով ֆինն Տերո Հալմեսմակիին (10:1), իտալացի Չիրո Ռուսոյին (4:0) ու հունգարացի Զոլթան Լեւային, դուրս եկավ եզրափակիչ, որտեղ ուժեղ գտնվեց լեհ Արկադիուշ Կուլինիչից՝ 2:1
Ռաֆայել Ալեքսանյանը հաղթանակով մեկնարկելուց հետո քառորդ եզրափակիչում 2:4 հաշվով պարտվեց հունգարացի Ռոբերտ Ֆրիտչին, որը դուրս եկավ եզրափակիչ: Ալեքսանյանը հնարավորություն ստացավ անցկացնել բրոնզե մեդալի համար գոտեմարտ եւ 10:4 հաշվով հաղթեց ֆրանսիացի Մոհամեդ Զարոուրիին: 71 կգ քաշային կարգում բրոնզե մեդալ նվաճեց նաեւ Ֆրանսիան ներկայացնող Էվրիկ Նիկողոսյանը:
Փարիզի մրցաշարում հունվարի 29-ին Հայաստանի ներկայացուցիչներից պայքարի մեջ կմտնեն Գեւորգ Ղարիբյանը (59 կգ) եւ Կարեն Ասլանյանը (66 կգ):
Տեսանյութում՝ Մաքսիմ Մանուկյանի եզրափակիչ գոտեմարտը
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։