Օլիմպիական փոխչեմպիոն Արմեն Մկրտչյան. Չեմ ցանկանում գնահատական տալ Արայիկ Բաղդադյանի աշխատանքին, քանի որ դա կլինի քննադատություն

18:23   25 հունվարի, 2017

Չեմ ցանկանում որեւէ մեկին քննադատել, գնահատական տալ Արայիկ Բաղդադյանի աշխատանքին, քանի որ դա կլինի քննադատություն: Ազատ ոճի հավաքականում կան խնդիրներ եւ մինչեւ Տոկիո-2020-ը կլուծենք այդ խնդիրները, որպեսզի գնանք դեպի օլիմպիական մեդալներ:

Այս մասին NEWS.am Sport-ի թղթակցի հետ զրույցում ասաց ազատ ոճի ըմբշամարտի Հայաստանի հավաքականի նորանշանակ գլխավոր մարզիչ, օլիմպիական փոխչեմպիոն Արմեն Մկրտչյանը, որը երկար տարիներ ակումբային մարզիչ է եղել Գերմանիայում։

1996թ. Ատլանտայի Օլիմպիական խաղերի փոխչեմպիոն (48 կգ քաշային կարգում), աշխարհի առաջնության բրոնզե մեդալակիր, Եվրոպայի չեմպիոն, ԽՍՀՄ միջազգային կարգի սպորտի վարպետ, Հայաստանի սպորտի վաստակավոր վարպետ Արմեն Մկրտչյանը փոխարինել է Արայիկ Բաղդադյանին:

Պարոն Մկրտչյան, NEWS.am Sport-ը շնորհավորում է Ձեզ ազատ ոճի ըմբշամատի Հայաստանի հավաքականի գլխավոր մարզիչ նշանակվելու կապակցությամբ: Ո՞ւմ կողմից եւ ինչպե՞ս ստացաք հավաքականը գլխավորելու առաջակը:

Շնորհակալ եմ: Առաջարկը ստացել եմ ՀԱՕԿ նախագահ Գագիկ Ծառուկյանից։ Մեծ սիրով ընդունեցի: Շնորհակալ եմ ՀԱՕԿ նախագահին այս վստահության համար, հավաքականը գլխավորելու պատասխանատու աշխատանքը ինձ վստահելու համար:

Հետեւե՞լ եք ազգային հավաքականի մրցելույթներին, հաջողություններին եւ պարտություններին: Պատկերացնո՞ւմ եք՝ ինչ աշխատանք է Ձեզ սպասվում:

Բոլոր մրցելույթներին հետեւել եմ, օլիմպիական ցիկլի սկզբից մինչեւ Ռիոյի Խաղեր: Հաջողություններով շատ ուրախ եմ, բայց արդեն բազմիցս նշել եմ, որ ունենք խնդիրներ, վերջին տարիներին թիմը հաջողությունների առումով մի փոքր հետ ընկած է եւ պետք է աստիճանաբար բոլոր այդ խնդիրներին լուծում տալ:

Դուք երկար տարիներ բնակվել եք Գերմանիայում: Ի՞նչն է իրականում եղել Հայաստանը եւ ազգային հավաքականը լքելու պատճառը:

Հայաստանից հեռանալու եւ հավաքականը լքելու կոնկրետ պատճառ չի եղել: Գերմանիայում ես մասնակցում էի ակումբային առաջնության եւ ունեի պայմանագիր: Դրան զուգահեռ շարունակում էի հանդես գալ Հայաստանի հավաքականից մինչեւ 2001 թվականը: Վերջին մեդալս ազգային հավաքականում եղել է 2001 թվականի Եվրոպայի առաջնության բրոնզե մեդալը, որից հետո վնասվածք ունեցա, քաշային կարգի փոփոխության խնդիր՝ նոր քաշ, որն ինձ համար միջազգային ասպարեզում հանդես գալու համար մեծ դժվարություն էր: Ժամանակ էր պետք, որ ես աճեի այդ քաշի համար, իսկ ակումբային առաջնություններում հանդես գալն ինձ շատ հարմար էր. ունեի պայմանագիր եւ այդպես մնացի Գերմանիայում: Արդեն շուրջ 10 տարի Գերմանիայում աշխատում եմ որպես մարզիչ: Թիմումս ունեմ երեք հայ ըմբիշ: Դեռեւս իմ ակումբի հետ պայմանագիրը չեմ խզել, սակայն զգուշացրել եմ: Իրենք ամեն ինչից տեղյակ են:

Հայաստանի հավաքականը գլխավորելու առաջարկը հեշտ ընդունվե՞ց Ձեր կողմից, թե՞ երկար եք մտածել, քանի որ պետք է տեղափոխվեք Հայաստան, հրաժարվեք Ձեր ակումբի թիմից:

Առաջարկի շուրջ մտածել եմ իհարկե, քանի որ երկար տարիներ եմ ապրում Հայաստանից դուրս. ունեմ ընտանիք, երեխաներ: Այս հարցը առաջին հերթին քննարկել եմ ընտանիքիս հետ եւ եկել ենք ընդհանուր հայտարարի: Բացի տեղափոխվելու հարցից, մտածել եմ նաեւ պատասխանատվության մասին. ազգային հավաքական ղեկավարելը շատ է տարբերվում ակումբային թիմ ղեկավարելուց։ Յուրաքանչյուրն իր նրբություններն ունի, բայց կարծում եմ՝ ավելի մեծ պատասխանատվություն կա ազգային հավաքականը գլխավորելու հացում. մեծահասկներ, երիտասարդներ, պատանիներ՝ պետք է հետեւել բոլոր տարիքային խմբերի աշխատանքին, որպեսզի հասկանանք ինչ ունենք, ինչի պակաս ունենք եւ խնդիրները որտեղից են գալիս:

Անմիջապես օլիմպիական շրջափուլի մեկնարկին եք վերցնում թիմի ղեկը: Մտավախություն, անհանգստություն չկա՞, որ գուցե այս 4 տարիները չբավականացնեն ցանկալի արդյունքին հասնելու համար:

Սպորտի մեջ միշտ պետք է ռիսկով լինել, միշտ առաջ գնալու մասին մտածել: Ըմբշամարտում, յուրաքանչյուր մարզաձեւում հաղթանակին հասնելու համար պետք է առաջ գնալ. սա ամենակարեւոր որակներից մեկն է, ձգտում, աշխատանք եւ արդյունքը ուշացնել չի տա:

Ի՞նչ խնդիր է Ձեր առջեւ դրել ՀԱՕԿ նախագահը եւ Դուք ի՞նչ խնդիր եք դրել ինքներդ Ձեր առջեւ:

Օլիմպիական խաղերի մեդալ. սա առաջնահերթ իմ խնդիրն է եւ մեր համատեղ խնդիրը ՀԱՕԿ նախագահի հետ: Սպորտում ամենաբարձր արդյունքը Օլիմպիական խաղերի մեդալներն են եւ մենք ըստ ծրագրի գնալու ենք դեպի մեդալներ:

Օլիմպիական մեդալ խոստանո՞ւմ եք :

Իհարկե... Կաշխատեմ: Ձգտումս, ցանկությունս դա է: Ինձ թվում է՝ պետք է լինի, անպայման:

Դուք Հայաստանի վերջին եւ միակ ազատ ոճի ըմբիշն եք եղել, ում հաջողվել է օլիմպիական մեդալ նվաճել: Ըստ Ձեզ, ի՞նչն է եղել այս տարիների անհաջողությունների պատճառը:

Ես չեմ ցանկանում որեւէ մեկին քննադատել, թերագնահատել: Չեմ ցանկանում այս հարցի պատասխանը տալ, քանի որ բոլորն իմ ընկերներն են: Լավ, վատ կամ ինչու չի եղել, սա կլինի քննադատություն, չեմ ցանկանում որեւէ մեկին քննադատել:

Ի՞նչ ժառանգություն եք ստացել: Ի՞նչ գնահատական կտաք նրա այս տարիների աշխատանքին:

Սա նորից կլինի քննադատություն, եթե գնահատական տամ: Չեմ ուզում իմ ընկերներին վիրավորել, նրանք բոլորն էլ աշխատել են բարձր արդյունքների համար, բայց սա մեծ սպորտ է եւ անհաջողություններից երբեք ապահովագրված չես: Գուցե դու հրաշալի մարզավիճակում ես, բայց միամիտ ձեռքդ կոտրես եւ չկարողանաս կարիերադ շարունակել: Ամեն մարզիչ ինքը գիտի իր սխալները: Չի կարելի սպորտում գնահատական տալ: Ըմբիշներն ասում են՝ գնահատականը գոտեմարտից հետո, որովհետեւ սա վայրկյանների սպորտ է եւ վերջին մի քանի վայրկյանում կարող ես մի թեթեւ տեխնիկական սխալի պատճառով անդառնալի պարտություն կրել:

 Լուսինե Շահբազյան



© 2019 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։