Նազիկ Ավդալյանն ու Հռիփսիմե Խուրշուդյանը՝ տարվա լավագույն տասնյակում ընդգրկվելու մասին

Հայաստանի լավագույն մարզիկների տասնյակում այս տարի երկու մարզուհի է ընդգրկվել՝ ծանրամարտի Եվրոպայի չեմպիոնների Նազիկ Ավդալյանն ու Հռիփսիմե Խուրշուդյանը, որոնք եւս մասնակցեցին «Փարավոնում» տեղի ունեցած մարզիկների մեծարման ամանորյա արարողությանը: Նազիկ Ավդալյանն ու Հռիփսիմե Խուրշուդյանը NEWS.am Sport-ի թղթակցի հետ զրույցում պատմեցին 2016-ում արածի եւ լավագույն տասնյակում ընդգրկվելու մասին։

«Շատ հաճելի է 6-7 տարվա դադարից հետո կրկին լինել լավագույն տասնյակում: Զարմանալիորեն լարվածություն էր առաջացնում միտքը, որ լավագույն տասնյակում եմ լինելու:

Այս տարի շատ բուռն էր ինձ համար, ծանր, բայց կարծում եմ՝ կարողացա պատվով դուրս գալ: Մեքենա նվեր ստացա, բայց դեռ չգիտեմ՝ ինչ եմ անելու այս ավտոմեքենան վարելու եմ, թե ոչ: Դեռեւս ավտովթարից հետո վախս մնացել է, ես ղեկին վախենում եմ: Դեռեւս ոչինչ չեմ խոստանա 2017-ին, քանի որ չեմ ծրագրել կմնամ, թե կհեռանամ մեծ սպորտից: Այս պահին ինձ նվիրել եմ որդուս, ժամանակս նրանն է, որոշ ժամանակ անց պարզ կլինի՝ շարունակելու եմ, թե ոչ»,- նշել է Նազիկ Ավդալյանը:

«Շատ ուրախ եմ ու հուզված, որ կրկին լավագույն տասնյակում եմ: Ամեն մարզիկ չի, որ կարողանում է ընդգրկվել լավագույն տասնյակում: Շնորհակալ եմ բոլոր իմ ուզող-չուզողներին: Ամեն ինչ կանեմ, որ հաջորդ տարի ավելի բարձր նվաճումներ ունենամ եւ կրկին լավագույնների շարքում լինեմ»,- ասաց Հռիփսիմե Խուրշուդյանը:

Լուսինե Շահբազյան