Ըմբիշները Արթուր Ալեքսանյանի գլխավորությամբ ֆուտբոլ են խաղում ու հաղթում (ֆոտոշարք)
19:59 26 դեկտեմբերի, 2016Եթե մինի ֆուտբոլի Հայաստանի առաջնությանը մասնակցենք, վստահ եմ, որ չեմպիոն կարող ենք լինել մեր թիմով: Հունահռոմեական ըմբիշներից շատերը կարող էին լավ ֆուտբոլիստներ լինել:
Այս մասին NEWS.am Sport-ի թղթակցի հետ զրույցում կես կատակ, կես լուրջ ասաց հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանը:
Հունահռոմեական ոճի ըմբշամարտի Հայաստանի մեծահասակների, երիտասարդների ու պատանիների հավաքականները գլխավոր մարզիչ Լեւոն Ջուլֆալկայնի, մարզիչներ Սամվել Գեւորգյանի եւ Գեւորգ Ալեքսանյանի ղեկավարությամբ այս օրերին հավաք են անցկացնում Ծաղկաձորի մարզաբազայում: Մեծահասակների հավաքին մասնակցում է թիմի ամբողջ կազմը Արթուր Ալեքսանյանի գլխավորությամբ:
«Ֆուտբոլ խաղալ տղաները շատ են սիրում: Հետաքրքիր են խաղում եւ բավական հաջող: Եթե ուզենանք, կարող ենք մեր թիմով մասնակցել մինի-ֆուտբոլի Հայաստանի առաջնությանը եւ հաղթել: Ուղղակի մեր տղաները մի քիչ կոպին ֆուտբոլ են խաղում, այդ պատճառով երեւի մեզ հետ խաղալ ցանկացողներ չլինեն: Բացի ֆուտբոլից նաեւ բասկետբոլ ենք խաղում, դահուկավազքով զբաղվում: Մեր տղաների մոտ շատ լավ է ստացվում յուրաքանչյուր մարզաձեւ»,- ասաց Լեւոն Ջուլֆալակյանը:
Ըմբշամարտի հավաքականների դեկտեմբերի հավաքները սովորաբար ուղղված են ընդհանուր ֆիզիկական պատրաստվածությանը, ծանրաբեռնված չեն եւ մարզումների մի մասն էլ խաղերի միջոցով են անցկացվում:
NEWS.am Sport-ի թղթակցի այցի օրը հունահռոմեականները ֆուտբոլ խաղացին: Արթուր Ալեքսանյանի թիմը յուրաքանչյուր խաղափուլում հաղթող էր դուրս գալիս: Օլիմպիական չեմպիոնին հեշտությամբ հաջողվում էր մրցակցի դարպասը գրավել կամ գոլային փոխանցումներ կատարել:
Լուսինե Շահբազյան
Լուսանկարները՝ Արսեն Սարգսյանի
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.