Լեւոն Ջուլֆալակյանն ամփոփում է օլիմպիական տարին. 2016-ը հաջողված էր հունահռոմեական ըմբիշների համար

Հաճելի է, որ մեծ սպորտում կարողացել եմ նվաճել բոլոր հնարավոր բարձունքները, իսկ այսօր նաեւ իմ թիմն ունի բոլոր այդ նվաճումները: 2016 թվականը հաջողված էր հունահռոմեականների համար:

Այս մասին NEWS.am Sport-ի թղթակցի հետ զրույցում ասաց օլիմպիական չեմպիոն, հունահռոմեական ըմբշամարտի Հայաստանի հավաքականի գլխավոր մարզիչ Լեւոն Ջուլֆալակյանը:

20 տարվա ընդմիջումից հետո օլիմպիական ոսկե մեդալը Հայաստան բերած հավաքականի գլխավոր մարզիչ Լեւոն Ջուլֆալակյանն ամփոփել է օլիմպիական տարին: Չնայած դրսում տոնական տրամադրություն է, հունահռոմեականները՝ օլիմպիական չեմպիոն Արթուր Ալեքսանյանի հետ դեռեւս մարզվում են Ծաղկաձորում: Հունահռոմեականներն անցկացնում են հաջողված տարվա վերջին ուսումնամարզական հավաքը Ծաղկաձորի մարզաբազայում: NEWS.am Sport-ի թղթակիցը ներկա է եղել տարեվերջյան մարզումներից մեկին:

Պարոն Ջուլֆալակյան, ամփոփեք օլիմպիական տարին: Ինչպիսի՞ն էր այն:

2016 թվականն օլիմպիական տարի էր եւ հունահռոմեական ըմբշամարտի Հայաստանի հավաքականը քառամյա ցիկլում նախապատրաստվել էր Ռիոյի Օլիմպիական խաղերին: Անցնելով երկար եւ բարդ ճանապարհ, քառամյա ցիկլում մեր հավաքականը բոլոր տարիներին նվաճեց տարբեր գույների բազմաթիվ մեդալներ եւ ուրախացրեց մեր ազգին: Բարդ քառամյա ցիկլի եզրափակումը եղավ Օլիմպիական խաղերը, որը շատ հաջող ստացվեց մեզ համար: Իհարկե, սպասումներն ավելի շատ էին, բայց ստացվեց լավ: Իսկ ինչու լավ, քանի որ մեր հավաքականն իսկապես կարող էր երկու օլիմպիական ոսկե, ինչու ոչ՝ նաեւ երեք մեդալով վերադառնալ վերադառնալ Օլիմպիական խաղերից: Ամեն դեպքում 2016 թվականը մեզ համար հաջող տարի էր. Եվրոպայի առաջնությունից վերադարձանք 4 մեդալով՝ 1 ոսկի, 2 արծաթ եւ 1 բրոնզ, ունեցանք 4 օլիմպիական վարկանիշ՝ 6 հնարավորից: Կարող էինք 5 վարկանիշ ունենալ, բայց վրիպեցինք 59 կգ քաշային կարգում: Գլխավորն այն է, որ որակով թիմ մասնակցեց Օլիմպիական խաղերին եւ 20 տարի սպասված ոսկե մեդալը նվաճեց մեր հավաքականը: Արթուր Ալեքսանյանն Օլիմպիական խաղերում արեց, այն ինչի ինքն ընդունակ էր. փառք ու պատիվ Արթուր Ալեքսանյանին, որ կարողացավ իր հնարավորություններն ազատ ցուցաբերել օլիմպիական գորգի վրա եւ նվաճել Հայաստանի 14-րդ օլիմպիական ոսկե մեդալը:

Իմ մարզչական կարիերայում տարբեր գույնի օլիմպիական մեդալներ նվաճել էր մեր թիմը, բայց ոսկին առաջինն էր, ինչի համար շատ ուրախ եմ: Հաճելի է, որ անցնելով մեծ սպորտի բարդ ճանապարհը, ունեցել եմ բոլոր հնարավոր նվաճումները եւ այսօր իմ գլխավորած հավաքականի մարզիկները նույնպես ունեն բոլոր հնարավոր մեդալները:

Իսկ ի՞նչ բացթողում ունեցաք այս տարի:

Եթե կա աշխատանք, ուրեմն կան նաեւ բացթողումներ: Որպես 2016-ի բացթողում կնշեմ Լոնդոն-2012-ի Օլիմպիական խաղերի արծաթե մեդալակիր Արսեն Ջուլֆալակյանի պարտությունը Ռիոյում: Արսեն Ջուլֆալակյանը լուրջ պատրաստված էր, լավ մարզավիճակում էր, բայց, ցավոք, մեծ սպորտում միշտ լինում են նման բաներ: Իրոք ցավալի էր. եթե Արսեն Ջուլֆալակյանը օլիմպիական մրցաշրջանում բացթողումներ ունեցած լիներ, գուցե համարեի, որ նման վերջաբանը սպասելի էր: Ես գտնում եմ, որ սա դեռ վերջաբանը չէ, սա սկիզբն է. Արսենը դեռ շատ անելիք եւ ասելի ունի: Մնում է միայն, որ նրա առողջությունն ու ցանկությունը բավականացնի մինչեւ հաջորդ Օլիմպիական խաղերին: Ժամանակից առաջ չանցնենք, ժամանակը ցույց կտա՝ ինչ եւ ինչպես կլինի:

Ինչպե՞ս կմեկնարկի հունահռոմեականների հավաքականը նոր օլիմպիական քառամյա փուլը:

Մենք արդեն պատրաստվում ենք Տոկիո-2020 Օլիմպիական խաղերին եւ նորից անցնելու ենք երկար ճանապարհ մինչ Խաղերը: Առաջին երկու տարին կլինի փորձարկումների շրջան, նոր, երիտասարդ մարզիկների կփորձարկենք: 2017 թվականը նորից ծանրաբեռնված տարի է լինելու հավաքականի համար. մարտին աշխարհի գավաթի խաղարկությունն է, որին կմասնակցենք 2-րդ, 3-րդ կազմով, ապա մայիսի 2-6-ը Սերբիայում կմասնակցենք Եվրոպայի առաջնությանը, իսկ օգոստոսին՝ աշխարհի առաջնությանը:

Պարոն Ջուլֆալակյան, մի քանի օրից Նոր Տարի է, բոլորն այս օրերին տոնական եռուզեռի մեջ են, իսկ ըմբիշները Ձեր գլխավորությամբ դեռեւս մարզադահլիճում են: Ե՞րբ եք տոնական դադար վերցնելու, մարզիկները քանի՞ օր կհանգստանան:

Ինչպես ամեն տարի, այս տարի եւս տարեվերջյան ուսումնամարզական հավաք ենք անցկացնում Ծաղկաձորում: Հավաքը ֆիզիկական պատրաստվածության ուղղվածություն ունի: Մինչեւ դեկտեմբերի 27-ը կշարունակվի հավաքը, որից հետո բոլորով կմասնակցենք ՀԱՕԿ-ի ամենամյա տոնական միջոցառմանը՝ նվիրված 2016 թվականի Հայաստանի լավագույն մարզիկների տասնյակին: Ինչպես անցյալ տարի, այս տարի եւս Հայաստանի լավագույն մարզիկ է ճանաչվել Արթուր Ալեքսանյանը, ինչի կապակցությամբ կրկին շատ ուրախ եմ: Միջոցառումից հետո մարզիկները 10-օրյա հանգստի կգնան, որից հետո կրկին մարզումներ, հավաքներ, մրցումներ:

Ի՞նչ կմաղթեք հունահռոմեական ըմբշամարտի Հայաստանի հավաքականի երկրպագուներին, մարզասերներին: Ձեր թիմին ի՞նչ կցանկանաք 2017 թվականին:

Շնորհավորում եմ ամբողջ հայ ազգի գալիք Նոր տարին, կցանկանամ, որ բարեկեցիկ կյանք լինի բոլորի համար, ապրեն անհոգ, ուրախ, երջանիկ, թող Նոր տարին միայն ուրախություն եւ հաջողություն բերի: Մեզ էլ այդ ամենի հետ հաղթանակներ:

Լուսինե Շահբազյան