Հակոբ Սերոբյան. Ազարյանի անվան մարզադպրոցի հատակը կիսաքանդված է, գործիքները մաշված են

14:42   12 դեկտեմբերի, 2016

Սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, Եվրոպայի չեմպիոն, աշխարհի բրոնզե մեդալակիր Հարություն Մերդինյանը եւ Եվրոպայի փոխչեմպիոն Արթուր Դավթյանն ամփոփեցին 2016 թվականը:

Հակոբ Սերոբյան.

«Տարին հաջողված էր: Լավագույն արդյունքներն ունեցանք այս տարի՝ աշխարհի գավաթակիր, Եվրոպայի չեմպիոն, Եվրոպայի երեք փոխչեմպիոն, երեք օլիմպիական, առաջին անգամ կին մարմնամարզուհու մասնակցություն Օլիմպիական խաղերին: 

Մեզ միայն չբավարարեց Օլիմպիական խաղերի արդյունքները: Սպասելիքներ ունեինք Հարություն Մերդինյանից, բայց, ցավոք, հոգեբանորեն նա չկարողացավ կատարել իր առջեւ դրած խնդիրը: Արթուր Դավթյանից էլ ակնկալում էինք եզրափակիչ, բայց չհաջողվեց:

Տարին դեռեւս չի ավարտվել, ունենք եւս մեկ միջազգային մրցաշար՝ Վորոնինի Գավաթ, որը տեղի կունենա դեկտեմբերի 19-ին:

2017 թվականը կսկսենք ծաղկաձորյան ուսումնամարզական հավաքով, ապա՝ մարտին Հայաստանի մեծահասակների առաջնություն, որի արդյունքներով չորս մարզիկներ կմեկնեն Դոհա՝ հավաքի եւ աշխարհի գավաթի խաղարկությանը: Ապրիլին Եվրոպայի առաջնությունն է, որին կմասնակցենք վեց մարզիկով: Այս Եվրոպայի առաջնությունը թիմային չի լինելու, միայն անհատական գործիքներով: Մայիսին Սլովենիայում ունենք աշխարհի գավաթի խաղարկություն, որից հետո երեք մարմնամարզիկով Սանկտ Պետերբուրգում կմասնակցենք միջազգային մրցաշարի: Օգոստոսին կմասնակցենք Ունիվերսիադային. կարծում եմ՝ երկու մարզիկով հանդես կգանք: Սեպտեմբերին Փարիզում ախարհի գավաթի խաղարկություն ունենք: Սեպտեմբեր-հոկտեմբերին տեղի կունենա աշխարհի առաջնությունը, որից առաջ նախատեսել ենք մեծ հավաք Թբիլիսիում»,- ասաց Հակոբ Սերոբյանը:

NEWS.am Sport-ի թղթակցի հետ զրույցում Հակոբ Սերոբյանը հայտնել էր, որ ֆեդերացիայի բյուջեն 21 միլիոն դրամից դարձել է 41 միլիոն: Հավաքականի գլխավոր մարզիչը դժգոհում է միայն Ալբերտ Ազարյանի անվան մարզադպրոցի անմխիթար վիճակից:

«Մարզագույքի խնդիր ունենք, որը փորձում ենք սեփական միջոցներով լուծել: Օրինակ՝ վերջերս Արթուր Դավթյանը Գերմանիայից իր հետ բերեց զուգափայտ գործիքի փայտերը: Դահլիճինը վնասված էր եւ դժվարությամբ էր լինում դրանց վրա մարզվել:  Կառավարության ավելացրած գումարով չենք կարող մարզագույք գնել, քանի որ այն նախատեսված է Հայաստանի առաջնություն անցկացնելու եւ մրցաշարերին մասնակցելու համար: Եթե նույնիսկ նոր մարզագույք ձեռք բերենք, հիմա չենք կարող տեղադրել, քանի որ մարզադահլիճի հատակը կիսաքանդված վիճակում է, փայտը մաշված է: Ցանկացած նոր գործիք շուտ շարքից դուրս կգա այդ հատակի վրա: Հույս ունեմ, որ մոտ ապագայում մեր մարզադպորցը վերջապես կվերանորոգվի:

Մեր մարզաձեւի նկատմամբ հանրության, կառավարության վերաբերմունքը փոխվել է, ուշադրությունը մեծացել է: Ժամանակին մեզ կարծես ոչ ոք չէր հավատում: Հարություն Մերդինյանը 2010 թվականին արդյունք ցույց տվեց, Արթուր Դավթյանը 2011-ին Եվրոպայի երիտասարդների չեմպիոն դարձավ, բայց այդ ժամանակ ուշադրությունն ու վերաբերմունքը մեր մարզաձեւի հանդեպ չփոխվեց: Իսկապես չէին հավատում մեզ: Ժամանակի ընթացքում ամեն ինչ փոխվեց: Կառավարության ու հանրության հետաքրքրության, մեզ հավատալու շնորհիվ հունվարից մեր բյուջեն 20 միլիոն դրամով կավելանա»,- նշեց գլխավոր մարզիչը:

Հարություն Մերդինյան.

«Ինձ համար հաջողված տարի էր 2016-ը, միայն չգոհացրեց օլիմպիական մրցելույթներս: Մարզիչներիս հետ որոշեցինք, որ ես պետք է շարունակեմ մարզական կարիերաս: Ցանկանում եմ այնպես ավարտել մարզական կարիերաս, որ հետագայում ոչնչի համար չափսոսամ: Ցանկանում եմ օլիմպիական մեդալով ավարտել մարմնամարզիկիս կարիերան: Առողջական խնդիր ունեմ, որն այժմ ինձ չի խանգարում: Երբ հասկանամ, որ իրականում չեմ կարողանա Հայաստանի հավաքականին օգտակար լինել եւ իմ մասնակցությամբ օլիմպիական մեդալ չեմ կարողանալու բերել Հայաստանին, անպայման կհայտարարեմ կարիերաս ավարտելու մասին»,- ասաց Հարություն Մերդինյանը:

Արթուր Դավթյան.

«Տարին շատ հաջողված էր ինձ համար: Ամեն ինչ հաջող ընթացավ եւ պլանավորածի՝ մարզումներ, մրցումներ, արդյունքներ, բացի Օլիմպիական խաղերից: Օլիմպիական խաղերում անհաջողություն ունեցա: Ոչինչ չխանգարեց ինձ, կարծում եմ այս Օլիմպիական խաղերը անհաջող փորձ էր»,- նշեց Արթուր Դավթյանը:

Լուսինե Շահբազյան



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։