«Մանչեսթեր Յունայթեդը» դուրս եկավ Անգլիական լիգայի գավաթի խաղարկության կիսաեզրափակիչ՝ «Օլդ Տրաֆորդ» ստադիոնում առավելության հասնելով «Վեստ Հեմի» նկատմամբ՝ 4:1: Հանդիպման մեկնարկից առաջ թիմերն ու երկրպագուները լռության րոպեով հարգեցին ավիաաղետի զոհ դարձած բրազիլական «Շապեկոենսեի» ֆուտբոլիստների եւ մարզիչների հիշատակը: Թիմերը խաղացին սգո սեւ թեւկապերով:
Արդեն երկրորդ րոպեին Հայաստանի հավաքականի կիսապաշտպան Հենրիխ Մխիթարյանի կրնկով կատարած փոխանցումից հետո շվեդ հարձակվող Զլատան Իբրահիմովիչը բացեց հաշիվը: 35-րդ րոպեին հյուրերը վերականգնեցին հավասարությունը անգլիացի կիսապաշտպան Էշլի Ֆլեթչերի գոլի շնորհիվ:
Ընդմիջումից հետո Հենրիխ Մխիթարյանը աչքի ընկավ երկրորդ գոլային փոխանցումով: Նրա սուր փոխանցումից հետո հաշիվը 2:1 դարձրեց Անտոնի Մարտիալը: Ֆրանսիացին դարձավ նաեւ դուբլի հեղինակ՝ 3:1: 90-րդ րոպեին Մխիթարյանին փոխարինեց անգլիացի հարձակվող Մարկուս Ռեշֆորդը: Ավելացված երրորդ րոպեին իր երկրորդ գոլը խփեց նաեւ Իբրահիմովիչը:
Կիսաեզրափակիչում են նաեւ «Լիվերպուլը», «Հալ Սիթին» եւ «Սաութհեմփթոնը»:
Անգլիական լիգայի գավաթ, քառորդ եզրափակիչ
«Մանչեսթեր Յունայթեդ» - «Վեստ Հեմ»՝ 4:1
Զլատան Իբրահիմովիչ, 2, 90+3 Անտոնի Մարտիալ, 48, 62 – Էշլի Ֆլեթչեր, 35
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։