«Ուրարտուի» նախագահ. Ֆինանսական ճգնաժամի մեջ ենք, եւ եթե խնդիրը չլուծվի, ակումբը կլուծարվի

18:08   18 նոյեմբերի, 2016

Երեւանի  «Ուրարտու»  բասկետբոլային ակումբը ֆինանսական ճգնաժամի մեջ է, տղաներն աշխատավարձ չեն ստանում եւ եթե այս խնդիրը չլուծվի, բնական է, որ ակումբը կլուծարվի: Բայց ես ինքս ամեն ինչ կանեմ, որ նման բան չլինի:

Այս մասին NEWS.am Sport-ի թղթակցի հետ զրույցում ասաց «Ուրարտու» բասկետբոլային ակումբի նախագահ Արա Պողոսյանը՝ մեկնաբանելով ակումբի փակման մասին շրջանառվող լուրերը:

Պարոն Պողոսյան, ի՞նչ խնդիր կա ակումբի ներսում: Ակումբի լուծարման մասին լուրերը համապատասխանո՞ւմ են իրականությանը:

Փակվելու, ակումբը լուծարելու մասին ընդունված որոշում չկա: Խնդիրներ ունենք, որոնք ուզում ենք լուծել: Իհարկե, չենք ցանկանում, որ թիմը լուծարվի, ամեն ինչ անում ենք, որ դա տեղի չունենա:

Շրջանառվում են լուրեր, որ ակումբի մարզիկներն ու մարզչական շտաբը տեւական ժամանակ է աշխատավարձ չեն ստացել:

Մենք ունենք մեծ ֆինանսական պրոբլեմներ, որոնք հենց առաջին օրվանից դժվարությամբ են լուծվում: Այդ խնդիրներն առ այսօր առկա են: Փորձում ենք ինչ-որ ճանապարհներ գտնել այդ բարդ իրավիճակից դուրս գալու, ճգնաժամը հաղթահարելու համար: Ֆինանսական խնդիրներն իրենց վատ ազդեցությունն են ունենում թիմի խաղի որակի վրա. բնական է, որ դժվար է խաղալ, երբ ֆինանսական ճնշում կա քո վրա:

Ինչպե՞ս եք պատրաստվում լուծել այս խնդիրը: Դիմե՞լ եք Սպորտի նախարարություն կամ բասկետբոլի ֆեդերացիա՝ աջակցության համար, չէ՞ որ ակումբը ՀԱՕԿ-ի եւ ֆեդերացիայի համատեղ նախագիծն էր:

Նախարարությունը պետական մարմին է, որն ունի իր բյուջեն եւ հնարավորություն չունի օգնել պրոֆեսիոնալ ակումբին: Կարող ենք նրանցից օգնություն խնդրել, բայց տարեսկզբին նախարարության բյուջեն արդեն բաշխված է եւ նրանք միեւնույն է՝ չեն կարողանալու մեզ օգնել: Նույնը վերաբերում է բասկետբոլի ֆեդերացիային: Այս ակումբը հենց ֆեդերացիայի, Օլիմպիական կոմիտեի համատեղ պրոեկտն է: Ֆեդերացիան էլ իր հերթին գումար է ստանում սպորտի նախարարությունից եւ գումարներն այնքան քիչ են, որ նույնիսկ բավարար չէ ներքին մրցումներ կազմակերպելու, պատանեկան բասկետբոլը զարգացնելու համար:

Ակումբը խաղում է Ռուսաստանի Սուպերլիգա 1-ում, սակայն դեռեւս միայն պարտություններ է կրում: Պատճառը ֆինասնական խնդիրնե՞րն են, թե՞ դեռ աճելու տեղ ունեն բասկետբոլիստները:

Այս խնդիրներն իհարկե իրենց ազդեցությունն ունենում են, բայց պարտությունները սպորտային մասն է։ Մեր խնդիրը կազմակերպչական է, որը փորձում ենք լուծել անկախ նրանից հաղթում ենք, թե պարտվում: Այս պահին թիմը գտնվում է Ռուսաստանի Եկատերինբուրգ քաղաք, որտեղ նոյեմբերի 19-ին Ռուսաստանի Սուպերլիգա 1-ի 8-րդ տուրի հանդիպում կանցկացնի «Ուրալի» հետ: Թիմը ոչնչի պահանջ չունի, ապրում է հյուրանոցում, նորմալ սնվում է, ինքնաթիռի տոմսերը նորմալ գնվել են եւ այլն: Մենք, կրկնում եմ, պրոբլեմներ ունենք, բայց աշխատում ենք հաղթահարել:

Ե՞րբ հստակ պարզ կլինի՝ ակումբը կշարունակի գործել, թե կլուծարվի:

Ես հույս ունեմ, որ ակումբը կգործի շատ երկար տարիներ, ես անձամբ ամեն ինչ կանեմ, որ թիմը չլուծարվի: Եթե միայն իմ հնարավորություններից կախված լիներ, թիմը երկար կգոյատեւեր, կզարգանար: Բայց խնդիրները միայն ինձանից կախված չեն: Փորձում ենք լուծել՝ առանց չակերտները բացելու:

Լուսինե Շահբազյան



© 2022 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։