Արթուր Ոսկանյան. «Բանանցը» միշտ պետք է պայքարի ամենաբարձր տեղերի համար
18:16 4 հոկտեմբերի, 2016«Բանանցը» միշտ պետք է պայքարի ամենաբարձր տեղերի համար եւ վատագույն արդյունքը պետք է լինի երկրորդ կամ երրորդ տեղը, ասել է երեւանյան ֆուտբոլային թիմի նորանշանակ գլխավոր մարզիչ Արթուր Ոսկանյանը:
«Երկար տարիներ է աշխատում եմ «Բանանցում», եղել եմ գլխավոր մարզիչի օգնական, վերջին երկու-երեք տարիներին աշխատել եմ «Բանանց-2»-ում ու լավ եմ հասկանում, թե ինչ պատասխանատվություն է դա: Կարծում եմ, որ «Բանանցը» Հայաստանի լավագույն ակումբն է՝ իր պայմաններով եւ մանկապատանեկան դպրոցով: «Բանանցը» միշտ պետք է պայքարի ամենաբարձր տեղերի համար եւ վատագույն արդյունքը պետք է լինի երկրորդ կամ երրորդ տեղը:
«Բանանց-2»-ում ինչ-որ արդյունքի հասել ենք թիմային ֆուտբոլի հաշվին: Նույն կերպ պետք է ձգտենք, որպեսզի երիտասարդ ֆուտբոլիստները եթե ոչ այսօր, ապա արդեն վաղը համալրեն «Բանանցի» շարքերը: Պետք է ձգտենք, որ նույն թիմային ֆուտբոլը, որը խաղում է «Բանանց-2»-ը, խաղա նաեւ «Բանանցը»:
Փոփոխություններ կլինեն, բայց պետք է հաշվի առնենք, որ «Բանանցում» արդեն կան ֆուտբոլիստներ, ովքեր կունենան իրենց հնարավորությունը: Հետագայում արդեն, ելնելով ակումբի փիլիսոփայությունից, կգերակշռեն հայ երիտասարդ ֆուտբոլիստները: Ակումբի ղեկավարության հետ առաջին զրույցը եղել է հենց այդ մասին. ամենակարեւորն է, որ թիմում գերակշռեն երիտասարդ հայ ֆուտբոլիստները: Դա տեղի կունենա ոչ շատ արագ, ոչ հենց այսօր, սակայն արդեն ձմռանը «Բանանց-2»-ի շատ ֆուտբոլիստներ կհամալրեն «Բանանցը»:
«Բանանց-2»-ը չի անտեսվելու, այն հանդիսանում է «Բանանցի» ամենակարեւոր մատակարարը եւ շարունակելու ենք մեծ ուշադրություն դարձնել այդ թիմին»,- Արթուր Ոսկանյանի խոսքն է մեջբերում «Բանանցի» կայքը:
Հիշեցնենք, որ «Բանանցի» ղեկավարությունն ու թիմի իսպանացի գլխավոր մարզիչ Տիտո Ռամալյոն հոկետմբերի 3-ին փոխադարձ համաձայնությամբ խզել են պայմանագիրը, հեռացել են նաեւ նրա մարզչական շտաբի իսպանացի մասնագետները:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.