Հազարավոր երկրպագուներ «Զվարթնոցում» դիմավորեցին օլիմպիական մեդալակիրներին (ֆոտո)

Նորանկախ Հայաստանի երկրորդ օլիմպիական չեմպիոն Արթուր Ալեքսանյանը, փոխչեմպիոններ Միհրան Հարությունյանը, Սիմոն Մարտիրոսյանն ու Գոռ Մինասյանը հազարավոր երկրպագուների կողմից հերոսավայել դիմավորման արժանացան «Զվարթնոց» օդանավակայում: Դիմավորողների մեջ էր նաեւ Հայաստանի վարչապետ Հովիկ Աբրահամյանը:

Երեւանի սիթի-տուրի ավտոբուսով Ռիոյի հայ մեդալակիրները ուղեւորվեցին Հանրապետության հրապարակ:

Հիշեցնենք, որ Ռիո դե Ժանեյրոյում անցկացված 31-րդ ամառային Օլիմպիական խաղերում 1 ոսկե, 3 արծաթե մեդալով Հայաստանը մեդալային հաշվարկում զբաղեցրեց 42-րդ տեղը:

Հունահռոմեական ըմբշամարտի աշխարհի կրկնակի չեմպիոն Արթուր Ալեքսանյանը ոսկե մեդալ նվաճեց 98 կգ քաշային կարգում, իսկ 66 կգ քաշային Միհրան Հարությունյանը եզրափակիչում  2014թ. աշխարհի չեմպիոն, սերբ 30-ամյա Դավոր Շտեֆանեկի հետ պայքարում կողմնակալ մրցավարության պատճառով զրկվեց ոսկե մեդալից:

Հայաստանին 2 արծաթե մեդալ պարգեւեցին ծանրորդները: Ռիոյում Հայաստանի առաջին մեդալը օգոստոսի 15-ին նվաճեց 19-ամյա Սիմոն Մարտիրոսյանը, որը երկրորդ տեղը գրավեց 105 կգ քաշային կարգում: Գերծանր քաշային Գոռ Մինասյանն էլ արծաթե մեդալակիր դարձավ հաջորդ օրը: 

Հիշեցնենք, որ Լոնդոն-2012 Օլիմպիական խաղերում Հայաստանը նվաճել էր մեկ արծաթե եւ 2 բրոնզե մեդալ ու Բելգիայի եւ Ֆինլանդիայի հետ 60-63-րդ տեղերն էր բաժանել մեդալային հաշվարկում: