Պելե. Ամբողջ կյանքում սպասել էի սրան

Բրազիլացի լեգենդար ֆուտբոլիստ Պելեն անդրադարձել է Բրազիլիայի հավաքականի նվաճած ոսկե մեդալին Ռիո դե Ժանեյրոյում ավարտված ամառային Օլիմպիական խաղերի ֆուտբոլի մրցաշարում:

«Բրազիլիան գրկաբաց դիմավորեց ամբողջ աշխարհին եւ բոլորին ցուցադրեց յուրահատուկ ապրելաոճ: Մենք տեսանք մարզական ոգու անմոռանալի դրսեւորումներ, հիասթափություններ ու անակնկալներ: Ամբողջ կյանքում սպասում էի, որ Բրազիլիան ոսկե մեդալ կնվաճի Օլիմպիական խաղերի ֆուտբոլի մրցաշարում: Երազանքս իրականացավ: Շնորհավարում եմ Խաղերի բոլոր մասնակիցներին»,- թվիթերյան էջում գրել է Պելեն:

Հիշեցնենք, որ Ռիո-2016-ի եզրափակիչում բրազիլացիները հետխաղյա 11 մետրանոցներով հաղթել էին Գերմանիայի հավաքականին: Հիմնական ժամանակն ավարտվել էր 1:1 հաշվով: Դա ֆուտբոլի աշխարհի 5-ակի չեմպիոն Բրազիլիայի հավաքականի առաջին օլիմպիական ոսկե մեդալն էր: