Ռիո-2016. Ամերիկացի լողորդների կողոպուտի սկանդալը բացահայտվեց, ԱՄՆ-ը ներողություն է խնդրում
14:43 19 օգոստոսի, 2016Բրազիլիայի ոստիկանությունը հետաքննության արդյունքում պարզել է, որ Ռիո-2016-ին ժամանած ամերիկացի լողորդները սխալ հաղորդում են տվել իրենց թալանելու վերաբերյալ, գրում է euronews.com-ը:
31-րդ ամառային Օլիմպիական խաղերին մասնակցած ամերիկացի լողորդներ Գունար Բենցն ու Ջեկ Կոնգերը Ռիո դե Ժանեյրոյից հեռացել են ոստիկանությունում հարցաքննության ենթարկվելուց հետո: Ռայան Լոխտեն էլ Ռիոն լքել էր այն բանից առաջ, երբ ոստիկանները պարզել էին, որ ամերիկացի լողորդներին ոչ ոքի չի թալանել: Ջեյմս Ֆեյգենը եւս կկարողանա վերադառնալ ԱՄՆ, քանի որ համաձայնել է բրազիլական բարեգործական կազմակերպությանը վճարել 11 հազար դոլար՝ սկանդալային իրավիճակից դուրս գալու համար:
ԱՄՆ-ի Օլիմպիական կոմիտեն Բրազիլիայից պաշտոնապես ներողություն է խնդրել եւ խոստացել, որ քայլեր կձեռնարկի:
Ավելի վաղ ամերիկացի լողորդները ոստիկաններին հայտնել էին, որ իրենց թալանել են: Նրանց սուտը բացահայտվել է դեպքի վայրում տեղադրված տեսախցիկների ձայնագրությունների շնորհիվ: Գիշերային ակումբում լավ ժամանակ անցկացնելուց հետո ամերիկացի լողորդներն ալկոհոլի ազդեցության տակ կանգ են առել բենզալցակայանում, որտեղ վնասել են իրենց իրերը: Բենզալցակայանի կառավարիչը լրագրողներին պատմել է, որ մարզիկները չեն ցանկացել մտնել զուգարան եւ միզել են պատերին: Հետո օլիմպիականները փորձել են թաքնվել: Բենզալցակայանի անվտանգության աշխատակիցը լողորդներին սպառնացել է զենքով՝ զանգելով ոստիկանություն, սակայն մինչ վերջիններիս ժամանելը մարզիկները համաձայնել են վճարել հասցրած վնասի համար եւ վերադառնալ օլիմպիական ավան:
Դրանից հետո ամերիկացի լողորդները հայտարարել էին, որ իրենց թալանել են ոստիկանական համազգեստ հագած կողոպտիչներ: ԱՄՆ-ի Օլիմպիական կոմիտեն էլ հայտնել էր, որ մարզիկներին տեղափոխող տաքսին կանգնեցրել էին զինված անձիք եւ պահանջել գումար եւ թանկարժեք իրեր:
Ռիո դե Ժանեյրոյի ոստիկանության ղեկավար Ֆերնանդու Վելոզուն կարծիք է հայտնել, որ ԱՄՆ-ի թիմի օլիմպիականները պետք է քաղաքի բնակչությունից ներողություն խնդրեն ստելու համար:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.