Արմեն Նազարյանը՝ Ռիոյից. Անչափ երջանիկ եմ, որ Հայաստանը վերջապես դարձյալ ունեցավ օլիմպիական չեմպիոն

22:20   17 օգոստոսի, 2016

Ինչպես եւ կանխատեսում էի եւ խոստացել էի, Արթուր Ալեքսանյանը օլիմպիական չեմպիոն է: Անչափ երջանիկ եմ, որ Հայաստանը վերջապես երկար տարիների դադարից հետո ունեցավ օլիմպիական չեմպիոն:

Այս մասին NEWS.am Sport-ի թղթակցի հետ զրույցում ասել է հունահռոմեական ոճի ըմբշամարտի կրկնակի օլիմպիական չեմպիոն, աշխարհի եռակի եւ Եվրոպայի վեցակի չեմպիոն, հունառոմեական ոճի ըմբշամարտի Բուլղարիայի հավաքականի գլխավոր մարզիչ Արմեն Նազարյանը:

Հիշենենք, որ օգոստոսի 17-ին, հունահռոմեական ոճի ըմբիշ, Եվրոպայի եռակի, աշխարհի կրկնակի չեմպիոն Արթուր Ալեքսանյանը Ռիո-2016-ում նվաճեց օլիմպիական ոսկե մեդալը՝ դառնալով անկախ Հայաստանի երկրորդ, Հայաստանի 14-րդ օլիմպիական չեմպիոնը: Անկախ Հայաստանի առաջին օլիմպիական չեմպիոնը հունահռոմեական ոճի ըմբիշ Արմեն Նազարյանն է:

Դեռ 2015 թվականի սեպտեմբերի 8-ին NEWS.am Sport-ին տված հարցազրույցում Արմեն Նազարյանը կանխատեսել էր, որ Արթուր Ալեքսանյանն անկասկած դառնալու է օլիմպիական չեմպիոն:

«Ինչպես եւ ես կանխատեսում էի եւ խոստացել էի, Արթուր Ալեքսանյանը օլիմպիական չեմպիոն է: Շնորհավորում եմ Հայաստանին եւ բոլոր հայերին՝ օլիմպիական չեմպիոն ունենալու, օլիմպիական մեդալներ նվաճելու կապակցությամբ:

Այս Օլիմպիական խաղերում Հայաստանի օլիմպիական թիմը կարողացավ նվաճել նաեւ արծաթե մեդալներ ծանրամարտում, ինչի համար անչափ ուրախ եմ: Օլիմպիական մեդալներն իսկապես բարձրագույն նվաճումներ են, եւ ես կուզեմ, որ այս նույն ոգով մյուս մարզաձեւերի հայ մարզիկները շարունակեն իրենց պայքարը եւ ուրախացնեն մեր ժողովդրին:

20 տարի անց վերջապես սառույցը կոտրվեց եւ կատարվեց իմ կանխատեսումները, որ մենք դեռ ունենալու ենք օլիմպիական չեմպիոն ու մեր մարզիկները սկսելու են այսուհետ կանգնել պատվո հարթակի ամենաբարձր աստիճանին:

Ես արդեն վերադառնում եմ Բուլղարիա, բայց երջանիկ եմ, շատ ուրախ եմ ու հպարտ, որ հայ եմ, եւ մենք ուժեղ ենք: Թող այս օլիմպիական ոսկին վերջինը չլինի»,- ասաց Արմեն Նազարյանը:

Լուսինե Շահբազյան



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։