Օլիմպիական չեմպիոն Արթուր Ալեքսանյանը պարգեւատրմանը Արցախի հերոս Ռոբերտ Աբաջյանի նկարով էր (ֆոտո)

Ռիոյի Օլիմպիական խաղերի չեմպիոնի տիտղոսը նվաճած հունահռոմեական ոճի ըմբիշ Արթուր Ալեքսանյանը պարգեւատրության արարողությանը մասնակցեց Ադրբեջանի ապրիլյան ագրեսիայի օրերին Արցախի սահմանները պաշտպանելիս արիաբար զոհված եւ հետմահու Արցախի հերոսի կոչում ստացած կրտսեր սերժանտ Ռոբերտ Աբաջյանի նկարով մարզաշապիկով:

20 տարի անց Հայաստանն ունեցավ օլիմպիական չեմպիոն: Գյումրեցի Արթուր Ալեքսանյանը դարձավ անկախ Հայաստանի պատմության երկրորդ օլիմպիական չեմպիոնը՝ կրկնելով Արմեն Նազարյանի հաջողությունը: Ռիո դե Ժանեյրոյում շարունակվող ամառային Օլիմպիական խաղերի հունահռոմեական ոճի ըմբշամարտի մրցաշարի 98 կգ քաշային կարգի եզրափակիչում աշխարհի կրկնակի չեմպիոնը 3:0 հաշվով վստահ հաղթանակ տարավ կուբացի Դանիել Յասմանի Կաբրերայի նկատմամբ: