Ռիո-2016. Մաքսիմ Մանուկյանի անհաջող մեկնարկը
17:08 15 օգոստոսի, 2016Մաքսիմ Մանուկյանն անհաջող մեկնարկեց Ռիո դե Ժանեյրոյում շարունակվող ամառային Օլիմպիական խաղերի հունահռոմեական ոճի ըմբշամարտի 85 կգ քաշայինների պայքարում:
Որակավորման փուլում 28-ամյա ըմբիշը 0:3 հաշվով պարտվեց հունգարացի Վիկտոր Լյորինցին: Հունգարացին դուրս եկավ 1/8 եզրափակիչ, որտեղ կհանդիպի հնդիկ Ռավինդեր Խանտրիի հետ: Եթե Լյորինցը հասնի եզրափակիչ, Մաքսիմ Մանուկյանը հնարավորություն կստանա պայքարել բրոնզե մեդալի համար:
Մաքսիմ Մանուկյանի գոտեմարտի ժամանակ Առաջին ալիքը ցուցադրում էր ռուսաստանցի Դավիդ Չակվետաձեի եւ ադրբեջանցի Սաման Տահմասեբիի գոտեմարտը:
Հիշեցնենք, որ հունահռոմեական ոճի ըմբշամարտի մրցաշարում Հայաստանի առաջին ներկայացուցիչ, Լոնդոնի 2012թ. Օլիմպիական խաղերի փոխչեմպիոն Արսեն Ջուլֆալակյանը պայքարի մեջ էր մտել օգոստոսի 14-ին եւ 75 կգ քաշայինների մեկնարկային գոտեմարտում պարտվել էր Բուլղարիայի ներկայացուցիչ Դանիել Ալեքսանդրովին, որն էլ պարտություն էր կրել հաջորդ փուլում:
Հունահռոմեական ոճի ըմբշամարտի Հայաստանի թիմի կազմում Ռիո են մեկնել նաեւ Միհրան Հարությունյանը (66 կգ) եւ Արթուր Ալեքսանյանը (98 կգ), որոնք մեդալների համար կպայքարեն օգոստոսի 16-ին:
Մաքսիմ Մանուկյանը ծնվել է 1987 թվականի դեկտեմբերի 10-ին Երեւանում:
Մանուկյանի մարզական կարիերան դադարներով է եղել: Սկսել է մարզվել 1998 թվականից, չորս տարի դադարից հետո վերադարձել է մեծ սպորտ ու վերսկսել մարզումները 2010 թվականից: Կազան-2013-ի Համաշխարհային ունիվերսիադայի փոխչեմպիոն է, 2014 թ. զինվորականների աշխարհի բրոնզե մեդալակիր: Անձնական մարզիչն է Ալեքսան Հովհաննիսյանը:
Ռիո-2016-ի ուղեգիրը նվաճել է Մոնղոլիայում անցկացված վարկանիշային մրցաշարում:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.