Ռիո-2016. Նարեկ Աբգարյանը ծանր մենամարտում հաղթանակ տարավ
01:03 14 օգոստոսի, 2016Ռիոյի Օլիմպիական խաղերի բռնցքամարտի մրցաշարում առաջին մենամարտն անցկացրեց Հայաստանի հավաքականի ներկայացուցիչ, 24-ամյա Նարեկ Աբգարյանը:
52 կգ քաշային կարգի 1/16 եզրափակիչում հայ բռնցքամարտիկը 2:1 հաշվով հաղթանակ տարավ Ուգանդայի ներկայացուցիչ, 31-ամյա Ռոնալդ Սերուգոյի նկատմամբ:
Առաջին ռաունդում հաղթեց Նարեկ Աբգարյանը, երկրորդ ռաունդում Սերուգոն, վճռական ռաունդում առավելությունը հայ մարզիկի կողմն էր:
Հաջորդ շրջանում Նարեկ Աբգարյանի մրցակիցը կլինի չինացի Յիանգուան Հուն: Մենամարտը տեղի կունենա օգոստոսի 16-ին:
Նարեկ Աբգարյան․ բռնցքամարտ, 52 կգ քաշային կարգ
Ծնվել է 1992 թվականի հունվարի 6-ին։ Ամուսնացած չէ:
Հայաստանի բազմակի չեմպիոն է, 2008թ. պատանիների Եվրոպայի բրոնզե մեդալակիր, 2012թ. Եվրոպայի մինչեւ 22 տարեկանների բրոնզե մեդալակիր, 2013-ին ՀՀ պաշտպանության նախարար Սեյրան Օհանյանի կողմից պարգեւատրվել է Վազգեն Սարգսյանի մեդալով, միջազգային մրցաշարերի հաղթող է, Բաքվում կայացած Եվրոպական խաղերի մասնակից։
Ռիո-2016 Օլիմպիական խաղերի ուղեգիրը նվաճել է Թուրքիայի Սամսուն քաղաքում անցկացված վարկանիշային մրցաշարում։
Անձնական մարզիչն է հավաքականի գլխավոր մարզիչ Կարեն Աղամալյանը։
Հիշեցնենք, որ Ռիոյում Հայաստանի բռնցքամարտիկներից 64 քաշային կարգի 1/16 եզրափակիչում Հովհաննես Բաչկովը մենամարտեց 24-ամյա վենեսուելացի Լուիս Մարտին Արկոնի հետ եւ հաղթեց 2:1 հաշվով: Օգոստոսի 14-ին կայանալիք 1/8 եզրափակիչի մենամարտում Հովհաննես Բաչկովը ռինգ դուրս կգա չինացի Քսյանսուն Հուի դեմ:
56 կգ քաշային Արամ Ավագյանը հաղթանակով մեկնարկեց՝ 2:1 հաշվով պարտության մատնելով 20-ամյա ճապոնացի Արաշի Մորիսակային: Օգոստոսի 14-ին կայանալիք 1/8 եզրափակիչի մենամարտում Արամ Ավագյանի մրցակիցը կլինի իռլանդացի Մայքլ Քոնլանը, որն առաջին շրջանում ազատ էր:
69 կգ քաշային Վլադիմիր Մարգարյանը երկրորդ մենամարտում առաջին ռաունդում հոնքի արնահոսող վնասվածքի պատճառով տեխնիական նոկաւոտով պարտվեց Լոնդոն-2012-ի Օլիմպիական խաղերի չեմպիոն (64 կգ քաշային կարգում), 27-ամյա կուբացի Ռոնիել Իգլեսիասին: 1/16 եզրափակիչում Վլադիմիր Մարգարյանը 3։0 առավելությամբ հաղթել էր Ֆիջիի ներկայացուցիչ Ուինսթոն Հիլին:
49 կգ քաշային Արթուր Հովհաննիսյանը մեկնարկային մենամարտում 0:3 հաշվով պարտվել է իսպանացի Սամուել Հարմոնա Հերերային եւ դուրս մնացել պայքարից:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.