Ռիո-2016. Օլիմպիական ավանում պոկել են Ռուսաստանի դրոշները, հետո էլ՝ գողացել

18:06   12 օգոստոսի, 2016

Ռիոյի Օլիմպիական ավանում պոկել են Ռուսաստանի դրոշները, իսկ հետո գողացել են:

«Այս մասնաշենքում միայն Ռուսաստանի պատվիրակությունն էր: Մենք ապրում ենք 16-րդ հարկում եւ կախել էինք Ռուսաստանի դրոշներ: Առավոտյան տեսանք, որ բոլոր ռուսական դրոշները պոկել, գցել են հատակին, հանգույցներով կապել: Մենք դարձյալ կախեցինք, բայց երեկոյան դրոշներն անհետացել էին:

Իմ մարզական կարիերայի ընթացքում երբեք այսպիսի մղձավանջ չեմ տեսել: Ռիոյում սուլում են ռուս մարզիկներին, ցուցադրաբար հրաժարվում են շնորհավորել մեդալակիրներին, ձեռք սեղմել»,- Ռուսաստանի հավաքականի անդամ, գեղալողորդուհի Ալեքսանդրա Պացկեւիչի խոսքը մեջբերում է kp.ru-ն:

Պացկեւիչը 2012թ. Լոնդոնի օլիմպիական չեմպիոն է, աշխարհի 11-ակի չեմպիոն: Ռիոյում գեղալողի մրցաշարը կմեկնարկի օգոստոսի 14-ին: Ռուսաստանը գլխավոր ֆավորիտն է:

Հիշեցնենք, որ դոպինգայի սկանդալների հետեւանքով Ռուսաստանի աթլետները, ծանրորդները, թիավարողների մի մասը եւ այլ մարզաձեւերի առանձին ներկայացուցիչներ զրկվել են օլիմպիական ուղեգրերից:



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։