Ռիո-2016. Հայաստանի օլիմպիականները. Գայանե Չիլոյան, Գոռ Ներկարարյան (ֆոտո)
22:11 10 օգոստոսի, 2016NEWS.am Sport-ը շարունակում է ներկայացնել Ռիո-2016-ի 31-րդ ամառային Օլիմպիական խաղերում Հայաստանի օլիմպիականներին:
Գոռ Ներկարարյան, աթլետիկա, հեռացատկ
Ծնվել է 1993 թվականի մարտի 24-ին, Վանաձորում:
Գոռ Ներկարարյանը Հայաստանի բազմակի չեմպիոն է, միջազգային մրցաշարերի հաղթող, Եվրոպայի եւ աշխարհի առաջնությունների մասնակից: Իր մարզական կարիերայում հայ աթլետը հնարավորություն է ունեցել 1,5 տարի ապրել եւ մարզվել Բրազիլիայում:
Ռիո-2016 ուղեգիրը նվաճել է Ուկրաինայի վարկանիշային մրցաշարում:
Գոռ Ներկարարյան
«Աթլետիկայով սկսել եմ զբաղվել 13 տարեկանից: Աթլետիկա մարզաձեւի ընտրությունն էլ շատ պատահական է եղել: Բակի ընկերներիցս մեկն առաջարկեց իր հետ գնալ մարզվելու, ես էլ համաձայնեցի: Փոքր տարիքում այդքան էլ մտադրություն չունեի շարունակել այս մարզաձեւով, քանի որ չէի մտածում, որ այս մարզաձեւում մեծ հաջողությունների կարող եմ հասնել:
Առաջին հաջողությունս այս մարզաձեւում եղել է 15 տարեկանում միջազգային մրցումներում՝ հաղթելով հեռացատկում եւ եռացատկում:
Օլիմպիական խաղերին մասնակցելու նպատակ ունեի վաղուց: 2013 թվականին հնարավորություն ունեցա մարզումներ անցկացնել Բրազիլիայում: Այնտեղի մարզումներս հենց այդ նպատակով էին, որ կարողանամ օլիմպիական ուղեգիր նվաճել եւ մասնակցել Ռիո-2016-ին: Հույս ունեմ, որ կկարողանամ լավ հանդես գալ եւ գերազանցել իմ արդյունքը»:
Գայանե Չիլոյան, աթլետիկա, 200 մ վազք
Ծնվել է 2000 թվականի սեպտեմբերի 27-ին:
16-ամյա աթլետը Հայաստանի չեմպիոն է, 100 մ եւ 200 մ մրցատարածություններում Հայաստանի ռեկորդակիր:
Ռիո-2016 ուղեգիրը նվաճել է Հայաստանի առաջնությունում օլիմպիական նորմատիվ լրացնելու շնորհիվ:
Գայանե Չիլոյան
«Աթլետիկայով զբաղվում եմ 2010 թվականից: Մորաքրոջս խորհրդով եմ ընտրել այս մարզաձեւը: Հենց սկզբից էլ ինձ մոտ ստացվել է, լավ արդյունքներ եմ գրանցել ու սկսել եմ մասնակցել մրցաշարերի: 2011 թվականին Թուրքիայում մասնակցեցի միջազգային մրցաշարի, զբաղեցրեցի երկրորդ տեղը եւ հասկացա, որ պետք է շարունակեմ այս մարզաձեւով լրջորեն մարզվել:
Բոլորի երազանքն է մասնակցել Օլիմպիական խաղերին, իմ երազանքն էլ է եղել: Ինձ մոտ ստացվեց, ես Հայաստանի առաջնությունում լրացրեցի օլիմպիական նորմատիվ եւ նվաճեցի օլիմպիական ուղեգիր: Օլիմպիակամ նորմատիվ լրացնելու համար հաջող հանդես գալուս ինձ օգնեցին եւ ոգեշնչեցին Ամալյա Շառոյանը, Լեւոն Աղասյանը, Դիանա Խուբեսերյանը, ովքեր արդեն նվաճել էին ուղեգրերը: Նրանց տեսնելով՝ ես էլ ոգեւորվեցի եւ կարողացա հաջողությամբ հաղթահարել 200մ մրցատարածությունը: Ռիո-2016-ում ցանկանում եմ բարելավել իմ արդյունքը»:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.