The Wall Street Journal-ը՝ օլիմպիական Հուռի Գեբեշյանի մասին
19:45 8 օգոստոսի, 2016Ամերիկահայ Հուռի Գեբեշյանը փորձում է կանանց սպորտային մարմնամարզության քարտեզին նշել Հայաստանը, գրում է ամերիկյան հեղինակավոր The Wall Street Journal-ը՝ անդրադառնալով Ռիոյի Օլիմպիական խաղերին մասնակցած մարզուհուն: Նրա մրցելույթը Օլիմպիական խաղերում պատմական էր հայկական սպորտի համար, քանի որ առաջին հայ մարմնամարզուհին էր, որը նվաճել էր Խաղերին մասնակցելու իրավունք եւ ներկայացնում էր Հայաստանը:
«Հայկական սփյուռքի համակրանքի մրցանակն անկասկած բաժին կհասնի Հուռի Գեբեշյանին: 27-ամյա բուժաշխատողը Քլիվլենդից է եւ Օսմանյան Թուրքիայում հայերի ցեղասպանությունից փրկված տատի թոռն է: Գեբեշյանի ծնողները Լիբանանից են: Նա Ռիոյում իրականացրեց երազանքը՝ մասնակցելով իր մարզական կյանքի ամենախոշոր մրցմանը եւ ամեն մրցելույթից հետո համբուրեց գործիքը՝ հրաժեշտ տալով կարիերային:
Գեբեշյանը կատարեց նոր տարր, որը կկոչվի նրա անունով: Զուգահեռ պտտաձողերի վրա վարժությունը սկսելուց անմիջապես հետո նա հրվեց ցածր պտտաձողից, շրջադարձ կատարեց 360 աստիճան եւ ցատկելով կախվեց բարձր պտտաձողից: Այդ տարրը նրա նորամուծությունն է:
Երկրպագուները սուլեցին մրցավարներին՝ համարելով, որ ցածր են գնահատել Գեբեշյանի կատարումը: «Ես շնորհակալ եմ սպորտին: Հայերն ամենուր են, շատ հաճելի է հանդիպել հայրենակիցների նաեւ Ռիոյում: Իմ նպատակն է նշել Հայաստանը կանանց սպորտային մարմնամարզության քարտեզին»,- ասել է Գեբեշյանը:
Օլիմպիական մրցելույթին Հուռին ներկայացավ սպիտակ համազգեստով, որի վրա ուրվագծված էր Արարատ լեռը՝ Հայաստանի խորհրդանիշը, որը Թուրքիայի տարածքում է: Նա նաեւ հիշեցրեց, որ իր տատն ու պապը վերապրել են Ցեղասպանությունը, ինչի հետեւանքով ծնողները ծնվել են Լիբանանում:
Մրցելույթից հետո Գեբեշյանը լուսանկարվեց եւ զրուցեց Ռուսաստանի ներկայացուցիչ Սեդա Թութխալյանի հետ: Զրույցը բարդացնում էր այն փաստը, որ լավ չգիտեն հայերեն»,- գրում է պարբերականը:
Հիշեցնենք, որ Գեբեշյանը չի հաղթահարել որակավորման փուլի արգելքը եւ ավարտել է օլիմպիական պայքարը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.