Սպորտի նախարար. Հայաստանի 33 օլիմպիականներից յուրաքանչյուրն էլ հնարավորություն ունի մեդալ նվաճել
15:35 26 հուլիսի, 2016Հայաստանի սպորտի նախարարը Ռիո-2016-ից մեծ թվով օլիմպիական մեդալների ակնկալիք ունի։
Ռիո-2016-ից հույսերը շատ մեծ են, սպասելիքներն ահռելի մեծ են, որովհետեւ բոլոր մարզիկները պատրաստ են ու այս 33-ից յուրաքանչյուրն էլ հնարավորություն ունի մեդալ նվաճել: Այս մասին NEWS.am Sport-ի թղթակցի հետ զրույցում ասաց Հայաստանի սպորտի նախարար Գաբրիել Ղազարյանն, ով այս գիշեր Հայաստանի օլիմպիական պատվիրակության երկրորդ խմբին ճանապարհել է Ռիո՝ 31-րդ ամառային Օլիմպիական խաղերին:
«Ես միանշանակ համակարծիք եմ ՀԱՕԿ նախագահ Գագիկ Ծառուկյանի հետ, որ մեր 33 օլիմպիականներից 20-ը մեդալի իրական հավակնորդ են: Չեմ կարող առանձնացնել, թե որ մարզաձեւերից: Այս Օլիմպիական խաղերն այն Խաղերն են, որ բոլոր մարզաձեւերից էլ կարող ենք մեդալ ունենալ: Պատահական չէ, որ ներկայացուցիչներ ունենք լողից, աթլետիկա մարզաձեւում 6 մարզիկները իրենք իրենց ուժերով նվաճել են օլիմպիական ուղեգրերը եւ երբեւէ Օլիմպիական խաղերին այսքան հայ աթլետ վարկանիշ ձեռք չի բերել: Ամենը երկար աշխատանքի արդյունք է՝ ՀԱՕԿ-ի, ազգային ֆեդերացիաների եւ սպորտի նախարարության աշխատանքն է: Ամենաբարձր մեդալների հույսերով օլիմպիական թիմին ճանապարհում ենք Ռիո»,- ասաց Գաբրիել Ղազարյանը:
Սպորտի նախարարը Ռիո կմեկնի օգոստոսի 9-ին: Խաղերի բացման արարողությունը օգոստոսի 5-ին է:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.