Կունգ-ֆուի աշխարհի առաջնություն. Հայաստանը նվաճեց 7 ոսկե մեդալ
19:11 24 հուլիսի, 2016Մոսկվայում Մարտարվեստների միջազգային փառատոնի օրերին անցկացված կունգ-ֆուի աշխարհի 5-րդ առաջնությունը Հայաստանի հավաքականի մարզիկներն ավարտեցին յոթ ոսկե, երեքական արծաթե եւ բրոնզե մեդալով՝ թիմային հաշվարկում գրավելով երրորդ տեղը: Առաջին տեղում Ռուսաստանն է, երկրորդ տեղում՝ Չինաստանը: Երկու թիմերն էլ մասնակիցների թվով երեքական անգամ գերազանցում էին Հայաստանի հավաքականին:
Թիջի մրցաոճում չեմպիոնական տիտղոսներ են նվաճել 55 կգ քաշային Հայկ Գասպարյանը (17-19 տարիքային խումբ), 70 կգ քաշային Դավիթ Կասումյանը (17-19), 50 կգ քաշայիններ Ալբերտ Թորոսյանն ու Վարդգես Մանասյանը (19+): Աշխարհի փոխչեմպիոն է դարձել 55 կգ քաշային Համիկ Քոչարյանը (19+):
Երրորդ տեղ են գրավել 65 կգ քաշային Էդուարդ Հակոբյանը (17-19) եւ 60 կգ քաշային Աշոտ Հարությունյանը (19+):
Շուայցզյաո (չինական ըմբշամարտ) մրցաոճում Հակոբ Հովհաննիսյանը (35+ տարիքային խումբ) արծաթե մեդալ է նվաճել 70 կգ քաշային կարգում, իսկ Գուրգեն Դանիելյանը (35+) բրոնզե մեդալակիր է դարձել 75 կգ քաշային կարգում:
Թայցզի տուշոու մրցաոճում Լիլիթ Արզումանյանը (19+ տարիքային խումբ) 52 կգ քաշային կարգում նվաճել է չեմպիոնի տիտղոսը՝ երկու մենամարտերում հաղթելով Ռուսաստանի ներկայացուցիչներին: Նույն տարիքային խմբում աշխարհի չեմպիոն է հռչակվել նաեւ 85 կգ քաշային Արմեն Ղահրամանյանը: Հակոբ Հովհաննիսյանը (35+) ոսկե մեդալ է նվաճել 70 կգ քաշային կարգում, Գուրգեն Դանիելյանը (+35)՝ արծաթե մեդալ, 60 կգ քաշային Արտակ Գրիգորյանը (19+)՝ նույնպես արծաթե մեդալ:
Հայաստանի հավաքականի գլխավոր մարզիչն է Արմեն Հարությունյանը, մարզիչն է Դավիթ Գրիգորյանը: Պատվիրակության ղեկավարն է Հայաստանի կունգ-ֆուի ֆեդերացիայի նախագահ Սարգիս Հարությունյանը:
Հայաստանի կունգ-ֆուի ֆեդերացիան աշխարհի առաջնությանը մասնակցելուն աջակցել է Meridian ընկերությունը:
Պարույր Սինյավսկի՝ Մոսկվայից
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.