«Բորուսիան» հաստատեց Հենրիխ Մխիթարյանի տեղափոխությունը «Մանչեսթեր Յունայթեդ»
15:50 2 հուլիսի, 2016Դորտմունդի «Բորուսիայի» եւ Հայաստանի հավաքականի կիսապաշտպան Հենրիխ Մխիթարյանը կարիերան կշարունակի անգլիական «Մանչեսթեր Յունայթեդում», հայտնում է գերմանական ակումբի կայքը:
«Հիմնվելով ստեղծված իրավիճակի վրա՝ այս տրանսֆերը չափազանց բարդ էր մեզ համար: «Մանչեսթեր Յունայթեդի» առաջարկը շատ շահավետ էր: Եթե մերժեինք առաջարկը, 2017-ի ամռանը ֆուտբոլիստը թիմից կհեռանար ազատ գործակալի կարգավիճակով, եւ մենք միայն մեկ տարով կհետաձգեինք այդ տեղափոխությունը»,- ասել է «Բորուսիայի» գլխավոր տնօրեն Հանս-Յոահիմ Վատցկեն:
«Բորուսիան» ակումբի կայքում Հենրիխ Մխիթարյանին հաջողություն է մաղթել Անգլիայի Պրեմյեր լիգայում եւ Եվրոպայի լիգայում: Նա կդառնա Անգլիայի Պրեմյեր լիգայում խաղացած առաջին հայ ֆուտբոլիստը:
Հիշեցնենք, որ Մխիթարյանը 2013-ին Դոնեցկի «Շախտյորից» էր տեղափոխվել «Բորուսիա», որը 27.5 միլիոն եվրո էր վճարել նրան ձեռք բերելու համար: Գերմանական ակումբի հետ 27-ամյա կիսապաշտպանի գործող պայմանագիրն ավարտվում է 2017-ի ամռանը եւ կողմերը փոխհամաձայնության չեն գալիս այն երկարաձգելու հարցում:
Ավելի վաղ բրիտանական լուրեր էին շրջանառվում, որ «Մանչեսթեր Յունայթեդը» 26 միլիոն ֆունտ ստերլինգ կվճարի Մխիթարյանին ձեռք բերելու համար։ Անգլիական ակումբի հետ նա կնքելու է 4 տարվա պայմանագիր՝ տարեկան 12 միլիոն եվրո աշխատավարձով։
Ավարտված մրցաշրջանում Հենրիխ Մխիթարյանը «Բորուսիայի» կազմում 52 խաղ է անցկացրել բոլոր մրցաշարերում եւ դարձել է 23 գոլի եւ 29 գոլային փոխանցման հեղինակ: Նա խաղադաշտում անցկացրել է 4383 րոպե:
Մխիթարյանը դարձավ «Մանչեսթեր Յունայթեդի» նորանշանակ գլխավոր մարզիչ Ժոզե Մոուրինյոյի երրորդ տրանսֆերն անգլիական ակումբում: Ավելի վաղ Անգլիայի 20-ակի չեմպիոնին միացել էին ֆրանսիական ՊՍԺ-ի շվեդ հարձակվող Զլատան Իբրահիմովիչն ու իսպանական «Վիլյառեալի» կոտդիվուարցի պաշտպան Էրիկ Բեյին:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.