Հայաստանի հավաքականի նախկին մարզիչը՝ Եվրո-2016-ում անգլիացիների անհաջողության պատճառների մասին

12:12   30 հունիսի, 2016

Ֆուտբոլային ֆիզպատրաստության հայտնի հոլանդացի մասնագետ, Հայաստանի հավաքականի մարզչական շտաբի նախկին անդամ Ռայմոնդ Վերհեյենը խոսել է անգլիացիների՝ Ֆրանսիայում ընթացող Եվրո-2016-ում անհաջողության պատճառների մասին:

«Ֆուտբոլում գոյություն ունի տարբերություն խաղային մարզավիճակի ու թարմության միջեւ: Դուք կարող եք գտնվել լավ մարզավիճակում, պատրաստ լինել խաղին, բայց միեւնույն ժամանակ չլինել թարմ: Ցանկացած խաղացող, լինելով հոգնած, խաղում է իր հնարավորություններից պակաս: Անգլիայի Պրեմյեր լիգայում խաղերն անցկացվում են առանց ձմեռային դադարի ու միշտ անցնում են ինտենսիվ: Հոգնածությունը մշտապես կուտակվում է 8-9 ամսվա ընթացքում: Ռոյ Հոջսոնն իր ֆուտբոլիստներին հանգստանալու հնարավորություն պետք է տար Եվրո-2016-ի նախապատրաստական փուլից առաջ»,-  Ռայմոնդ Վերհեյենի խոսքը մեջբերում է talkSport-ը:

Հիշեցնենք, որ Եվրո-2016-ի 1/8 եզրափակիչում Անգլիայի հավաքականը սենսացիոն պարտություն կրեց Իսլանդիայից եւ լքեց պայքարը: Ռայմոնդ Վերհեյենը Եվրո-2012-ի ընտրական փուլում աշխատել է Հայաստանի հավաքականի հետ։ Նա աշխատել է նաեւ կատալոնական «Բարսելոնայում», Լոնդոնի «Չելսիում», «Մանչեսթեր Սիթիում», Հոլանդիայի, Ռուսաստանի եւ Ուելսի հավաքականներում:  



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.