Ռիո-2016. Հայաստանի ազատ ոճի ըմբիշների նախաօլիմպիական ծրագրերը

13:47   23 հունիսի, 2016

Ռիո-2016 Օլիմպիական խաղերի մասնակից երեք ազատ ոճային ըմբիշներ Գառնիկ Մնացականյանը, Գեորգի Կետոեւը եւ Լեւան Բերիանիձեն կմասնակցեն հունիսի 24-26-ը Վանաձորում կայանալիք Ստեփան Սարգսյանի անվան միջազգային մրցաշարին:

Այս մասին NEWS.am Sport-ի թղթակցի հետ զրույցում ասաց ազատ ոճի ըմբշամարտի Հայաստանի հավաքականի մարզիչ Հովսեփ Հովսեփյանը, ում ղեկավարությամբ ազատ ոճայինները, այդ թվում՝ օլիմպիականները, ծաղկաձորյան ուսումնամարզական հավաքի վերջին մարզումներն են անցկացնում այս օրերին: Ազատ ոճայինների գլխավոր մարզիչ Արայիկ Բաղդադյանը զբաղված է Ստեփան Սարգսյանի անվան միջազգային մրցաշարի կազմակերպչական աշխատանքներով եւ հունիսի 24-ին ազատ ոճայիններին կդիմավորի Վանաձորում: Հունիսի 24-ին կկայանա ըմբիշների կշռման արարողությունը:

«Ծաղկաձորի հավաքը մեկնարկել էր հունիսի 10-ից, մասնակցում էին մեր բոլոր օլիմպիականները՝ Դավիթ Սաֆարյանը, Գեորգի Կետոեւը, Լեւան Բերիանիձեն եւ Գառնիկ Մնացականյանը: Նրանց հետ էին երեք վրացի ըմբիշներ հատուկ Գեւորգի Կետոեւի եւ Լեւան Բերիանիձեի համար. նրանց քաշային կարգերում քիչ ըմբիշներ ունենք սփարինգների համար, այդ պատճառով նպատակահարմար գտանք դրսից հրավիրել: 14-օրյա մարզումային փուլ անցան հավաքականի մյուս անդամների հետ: Երեք օլիմպիականների համար՝ Գառնիկ Մնացականյանի, Գեորգի Կետոեւի եւ Լեւան Բերիանիձեի համար այս հավաքը նաեւ Ստեփան Սարգսյանի անվան միջազգային մրցաշարից առաջ նախապատրաստական փուլ էր: Մրցաշարը բաց կթողնի Դավիթ Սաֆարյանը, քանի որ այս տարվա ընթացքում նա արդեն հասցրել է մասնակցել 6 միջազգային մրցաշարի, այդ թվում եւ վարկանիշային: Նա այժմ իր ուժերը կենտրոնացրել է Օլիմպիական խաղերի նախապատրաստման վրա:

Մյուս օլիմպիականների համար այս մրցաշարում մասնակցությունը շատ կարեւոր է, քանի որ մասնավորապես Կետոեւը եւ Բերիանիձեն Օլիմպիական խաղերին պետք է մասնակցեն մրցաշարերին մասնակցելով: Կետոեւը մեծ փորձ ունեցող տիտղոսակիր ըմբիշ է, Օլիմպիական խաղերի բրոնզե մեդալակիր, աշխարհի եւ Եվրոպայի չեմպիոն Ռուսաստանի հավաքականի կազմում, մինչեւ Հայաստանի հավաքական ընդգրկվելը, երկու տարի դադարի մեջ է եղել եւ մրցաշարերի չի մասնակցել: Հայաստանի հավաքականի կազմում այդ տեւական դադարից հետո միայն մեկ անգամ է մասնակցել մրցաշարի՝ Մոնղոլիայի վարկանիշային մրցաշարն էր: Լեւան Բերիանիձեն վերջին մրցաշարը եղել է Լաս Վեգասի աշխարհի առաջնությունը, որտեղ էլ նա նվաճեց իր օլիմպիական ուղեգիրը: Գառնիկ Մնացականյանը մեծահասակների կազմում իր առաջին ու դեռեւս միակ մրցաշարը եղել է Մոնղոլիայի վարկանիշային մրցաշարը, որտեղ նա նվաճեց օլիմպիական ուղեգիր: Մեծահասակների կազմում Գառնիկը չի մասնակցել ոչ Եվրոպայի, ոչ աշխարհի առաջնությանը: Գառնիկ Մնացականյանի համար եւս շատ կարեւոր է Օլիմպիական խաղերից առաջ միջազգային մրցաշարի մասնակցելը»,- ասաց Հովսեփ Հովսեփյանը:

Ստեփան Սարգսյանի անվան միջազգային մրցաշարից հետո ազատ ոճայինները կսկսեն նախաօլիմպիական մարզումային փուլը:

«Հավաքականի գլխավոր մարզիչ Արայիկ Բաղդադյանի ղեկավարությամբ արդեն որոշված է Օլիմպիական խաղերի նախապատրաստական մարզումային փուլը. կունենանք երկու մեծ հավաք Ռուսաստանի եւ Վրաստանի հավաքականների հետ: Հուլիսի 2-ից հավաք կանցկացնենք Ռուսաստանի թիմի հետ Կիսլովոդսկ քաղաքում մինչեւ հուլիսի 16-ը: Ի դեպ, Ռուսաստանի հավաքականի հետ համատեղ հավաք անցկացնելու հնարավորություն ոչ բոլոր ցանկացողներին է տրվում. Ռուսաստանի հավաքականն ուղղակի թույլ չի տալիս, որ իր թիմի հետ ամեն ցանկացող երկրի թիմ համատեղ մարզվի:

Հուլիսի 26-ից Վրաստանի թիմին կմիանանք, հավաք կանենք ու դրանից հետո կմեկնենք Ռիո»,- նշեց մարզիչը:

Արդեն հայտնի են նաեւ ազատ ոճայինների օլիմպիական մրցելույթների օրերը Ռիո-2016-ում:

«Օգոստոսի 19-ին կշռման արարողությունն է, 20-21-ին դուրս կգան մրցագորգ: Այս Օլիմպիական խաղերին մի տեսակ անհանգստությամբ եւ անհամբերությամբ եմ սպասում ու ամենակարեւորը՝ հույսով: Ես Լոնդոնի Օլիմպիական խաղերում կրկին հավաքականի երկրորդ մարզիչն էի: Այդ ժամանակ ամեն ինչ շատ արագ ու միանգամից կատարվեց, չհասցրեցինք հասկանալ ինչպես, ինչու: Դա իմ ու Արայիկ Բաղդադյանի առաջին օլիմպիական փորձն էր: Իսկ այս Խաղերում ամեն ինչ մի փոքր այլ է: 4 ուղեգիր ունենք, սա վատ չէ, բայց կարող էր 5-ը լինել. 5-րդը պետք է Գրիգոր Գրիգորյանը լիներ, բայց սայթաքեց: Գրիգորն արժանի էր այդ օլիմպիական ուղեգրին, ցավոք, բաց թողեց: Լոնդոնի Օլիմպիական խաղերին հույսով էինք գնացել, Դավիթ Սաֆարյանից սպասում էինք, որ մեդալ կվերցնի, բայց ամեն ինչ կայծակնային արագությամբ եղավ ու բաց թողեցինք:

Այս Խաղերին իսկապես, ես իմ անունից կխոսեմ, մեծ հույսով ենք գնում: Մեր 4 օլիմպիականներից յուրաքանչյուրն էլ վտանգավոր մրցակից են լինելու մրցագորգի վրա եւ 4-ն էլ կարող են հաղթել: Մեզ միայն մի քիչ սպորտային հաջողություն է անհրաժեշտ: Հավատում եմ, որ այս անգամ հաջողություն ենք ունենալու»,- նկատեց Հովսեփ Հովսեփյանը:

Լուսինե Շահբազյան



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։