Ալբերտ Ազարյան. Հայ մարմնամարզիկների հաջողությունները կարգապահ մարզիչների շնորհիվ է
17:07 20 հունիսի, 2016Հայ մարմնամարզիկների հաջողությունները իմ կարգապահ աշխատողների՝ մարզիչների շնորհիվ է: Այս մասին NEWS.am Sport-ի թղթակցի հետ զրույցում ասաց եռակի օլիմպիական չեմպիոն, աշխարհի քառակի չեմպիոն, Հայաստանի մարմնամարզության ֆեդերացիայի նախագահ Ալբերտ Ազարյանը:
Պարոն Ազարյան, Ռիո-2016-ի մեկնարկին քիչ ժամանակ է մնացել: Մարմնամարզության Հայաստանի թիմը երեք օլիմպիականով է հանդես գալու: Ի՞նչ տրամադրությամբ եւ ակնկալիքներով եք Ձեր սաներին ճանապարհելու Ռիո:
Շատ ուրախ եմ, որ Ռիո-2016 Օլիմպիական խաղերում երկու ուժեղագույն մարմնամարզիկներով ենք հանդես գալու եւ ունենք նաեւ ներկայացուցիչ կանանց մրցապայքարում: Ինձ համար սա մեծ հպարտություն է, որ մեր մարզիկները աշխարհի ու Եվրոպայի առաջնություններում բարձր տեղեր են արդեն գրավում եւ իրենց մասնակցությունը հաստատել են Օլիմպիական խաղերում՝ նվաճելով ուղեգրեր:
Եվ ի՞նչ կանխատեսումներ ունեք:
Կանխատեսումների մասին նախապես հնարավոր չէ խոսել: Ես միայն կարող եմ նրանց հաջողություն մաղթել Օլիմպիական խաղերում, մնացածի մասին իրենք պետք է գան ու ինձ ասեն, թե ինչպես հանդես եկան, ինչ արեցին եւ ինչ արդյունք գրանցեցին: Ես միայն ուրախ եմ, որ նրանք մասնակցում են Օլիմպիական խաղերին:
Վերջին տարիներին ակնհայտ լավացել են հայ մարմնամարզիկների արդյունքները, 51 տարի անց կրկին Եվրոպայի չեմպիոն ունեցանք: Ի՞նչն էր երկարատեւ անհաջողությունների պատճառը: Ի՞նչ էր պակասում հայ մարմնամարզիկներին նախքան այս:
Իսկապես երկար ժամանակ անցավ մինչ մեր մարզիկները նորից սկսեցին մեզ ուրախացնել իրենց հաջողություններով: Նրանց հաջողությունների շնորհիվ այսօր մարմնամարզությունը կրկին վայելում է բոլորի ուշադրությունը: Հաջողությունը իմ մարզիչների աշխատանքի արդյունքն է՝ ավագ մարզիչ Հակոբ Սերոբյանի գլխավորությամբ: Նրանք ջանասիրաբար աշխատում են յուրաքանչյուր մրցաշարից առաջ ու նրանց տանջանքն արդյունք է տալիս:
Հայաստանում մարմնամարզությունը զարգանալու կարիք ունի. այսօր մենք ունենք մարմնամարզության ընդամենը երկու դպրոց՝ իմ եւ Հրանտ Շահինյանի անվան մարզադպրոցները: Իսկ նախկինում մեր մարզադպրոցները եղել են մի քանի տասնյակը: Ժամանակի ընթացքում ամեն ինչ քանդվեց, փլուզվեց: Մարմնամարզությունը ստիպված եղավ վերածնունդ ապրել մեր երկրում: Ու այսքան տարի անց հաջողությունը սկսել է մեզ ժպտալ, դա իմ հավատարիմ աշխատողների՝ մարզիչների շնորհիվ է, նրանց կարգապահության շնորհիվ: Ու ես հավատում եմ, որ հաջողությունը դեռ կշարունակի մեզ ժպտալ: Մոտ ենք հաղթանակներին:
Լուսինե Շահբազյան
Լուսանկարն՝ Էմմա Ասատրյանի
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.