Ցյուրիխում ՖԻՖԱ-ի թանգարանը՝ NEWS.am Sport-ի աչքերով (ֆոտոշարք)

12:35   25 մայիսի, 2016

NEWS.am Sport-ի թղթակցին հաջողվել է լինել ՖԻՖԱ-ի թանգարանում, որը բացվել էր այս տարվա փետրվարին Շվեյցարիայի Ցյուրիխ քաղաքում:

Առաջնորդվելով «Ավելի լավ է մի անգամ տեսնել, քան հարյուր անգամ լսել» սկզբունքով, կփորձենք լուսանկարների միջոցով նկարագրել մեր էքսկուրսիան:

3 հազար քառակուսի մետր տարածք, 1000-ից ավելի ցուցադրանմուշ, 30 միլիոն շվեյցարական ֆրանկ թանգարանի կառուցման համար. դրանք միայն թվեր են, որոնք, սակայն, շատ բան են ասում: Սկսենք էքսկուրսիան:

Առաջին հարկում ամեն ինչ շվեյցարական ոճով է՝ գեղեցիկ սրճարան, գրադարան ու ծաղիկներով շրջապատված դարատափ:

Իջնելով ներքեւ՝ միանգամից տեսնում ես հսկայական էկրան, որի վրա ցուցադրվում են ֆուտբոլային եւ ֆուտբոլի հետ կապված կադրեր: Կենտրոնում տեղադրված ցուցափեղկերի վրա ՖԻՖԱ-ի անդամ բոլոր հավաքականների մարզաշապիկներն ու ֆեդերացիաների տարբերանշաններն են՝ նշված, թե որ թվականին են նրանք դարձել ՖԻՖԱ-ի անդամ: Հայաստանի հավաքականի մարզաշապիկը գտնելը ստացվեց շատ արագ: 

Իջնելով ցած՝ հանդիպում ես այնքան հետաքրքիր տեսարանների, որ մի պահ դադարում ես լսել հաճելի բրիտանական ակցենտով թանգարանի մասին պատմող գիդի ասածները:

Այստեղ է նաեւ այն «ձեռագիրը», որի վրա 1800-ին գրվել են ֆուտբոլի առաջին կանոնները: Դրա կողքին են նաեւ աշխարհի գավաթն ու տարբեր փաստաթղթեր ու ցուցադրանմուշներ՝ նվիրված ֆուտբոլի պատմության ամենաուշագրավ իրադարձություններին:

Էքսկուրսիայի վերջում հյուրերն այցելում են կինոսրահ, որտեղ մի քանի րոպեանոց ֆիլմով վերհիշում են աշխարհի առաջնությունների ուրախ ու տխուր պահերը, հիասթափությունները, հույզերը, գեղեցիկ գոլերն ու կարեւոր իրադարձությունները: Մունդիլաների ամբողջ պատմությունը ներկայացվում է տպավորիչ հոլովակում: Ստադիոն մտնել փորձող հազարավոր երկրպագուներ, երիտասարդ Եղիսաբեթ Երկրորդ թագուհին «Ուեմբլի» ստադիոնի VIP օթյակում (ԱԱ-1966-ի եզրափակիչից առաջ), հոլանդացի Արյեն Ռոբենի հուսալքված դեմքն Իսպանիայի դեմ ԱԱ-2010-ի եզրափակիչում Իկեր Կասիլյասի դեմ մեն-մենակ դուրս գալուց եւ վրիպելուց հետո:   

Շուտով ֆիլմն ավարտվում է եւ սեւ էկրանի ֆոնին բացվում են 2 լուսավոր դռներ: Դր՞ախտ. ոչ, ժամանակն է մտնել վերելակը, էքսկուրսիան ավարտվում է:

Սամվել Սուքիասյան՝ Ցյուրիխից

Ֆոտո՝  Սամվել Սուքիասյան / NEWS.am Sport



© 2026 NEWS.am - Sport

The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.