Հայ օլիմպիական չեմպիոնը կառավարությունից կստանա 30 միլիոն դրամ
14:13 29 հունիսի, 2012Հայաստանը Լոնդոնի Օլիմպիական խաղերում պետք է ունենար ոչ թե 25, այլ` 30 օլիմպիական. ՀԱՕԿ-ը պայքարել է Երջանիկ Ավետիսյանի եւ Ռոման Ամոյանի համար, բայց բոլոր նամակները եւ խնդրանքներն անպատասխան են մնացել: Այսօր` հունիսի 29-ին, լրագրողների հետ հանդիպման ժամանակ այդ մասին ասաց Հայաստանի Ազգային օլիմպիական կոմիտեի փոխնախագահ, Հայաստանի բռնցքամարտի ֆեդերացիայի փոխնախագահ, Լոնդոնի Օլիմպիական խաղերում Հայաստանի մարզական պատվիրակության հանձնակատար Դերենիկ Գաբրիելյանը:
«Մենք բավական ուժեղ եւ պատրաստված թիմով ենք ներկայանալու Օլիմպիական խաղերում: Հուսամ, այնտեղ խնդիրներ չենք ունենա, քանի որ ես արդեն մեկ անգամ եղել եմ Լոնդոնում եւ հանդիպել եմ կազմակերպիչների հետ: Մենք խնդրել ենք կազմակերպիչներին, որ հարեւան երկրների պատվիրակություններից հեռու սենյակներ հատկացնեն, որպեսզի խնդիրներ չունենանք: Պեկինում կրկին ես էի պատվիրակության ղեկավարը: Այդ ժամանակ էլ Ադրբեջանի եւ Թուրքիայի հետ հարեւանություն չկար: Այդ ժամանակ ես մեկ ամբողջ օր պայքար տարա, որ մեզ տեղավորեն այնտեղ, որտեղ մենք ցանկանում ենք»,- նշեց Դերենիկ Գաբրիելյանը:
Լոնդոնի օլիմպիական ավանում Հայաստանի դրոշը կբարձրացվի հուլիսի 21-ին։
«Հուլիսի 29-ին Լոնդոնի եկեղեցիներից մեկում լինելու է մեծ հայկական արարողություն, իսկ մինչ այդ հուլիսի 21-ին օլիմպիական ավանում հանդիսավոր պայմաններում բարձրացվելու է Հայաստանի դրոշը: Պեկինում այդ արարողությանը մասնակցեց քաղաքապետը։ Լոնդոնում էլ մենք կանենք այնպես, որ հեղինակավոր անձնինք մասնակցեն այդ արարողությունը»,- հայտնեց Դերենիկ Գաբրիելյանը:
Հայաստանի օլիմպիական պատվիրակությունը կառավարությունից ստացել է 180 միլիոն դրամ։ Այս գումարի մեջ չի մտնում պարգեւատրումները: Ինչպես Պեկինի Օլիմպիական խաղերի ժամանակ, այնպես էլ Լոնդոնի Օլիմպիական խաղերում Հայաստանի կառավորությունը ոսկե մեդալի համար նախատեսել է 30 միլիոն դրամ, արծաթե մեդալի համար` 20 միլիոն դրամ եւ բրոնզե մեդալի համար 10 միլիոն դրամ պարգեւավճար:
«Առանձին պարգեւատրում է նախատեսել նաեւ ՀԱՕԿ նախագահ Գագիկ Ծառուկյանը: 2008թ. Պեկինի Օլիմպիական խաղերի ժամանակ հայտարարեց, որ ոսկե մեդալ նվաճած մարզիկին կնվիրաբերի 700.000 դոլար: Կարծում եմ, այս տարի նա իր խոսքի տերը կլինի եւ նույնքան գումար կնվիրի ոսկե մեդալակրին:
Իսկ թե ով է մեր թիվ մեկ հույսը եւ ումից ակնկալենք ոսկե մեդալ, առայժմ չեմ կարող ասել»,- նշեց Դերենիկ Գաբրիելյանը։
30-րդ Օլիմպիադայի խաղերի բացման արարողությունը տեղի կունենա հուլիսի 27-ին Լոնդոնում։ Հայաստանը կունենա 25 մասնակից։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.