Նիկիտա Սիմոնյան. Պելեից հետո ինձ համար երկրորդը Կրոյֆն էր
22:42 24 մարտի, 2016Կրոյֆը տոտալ ֆուտբոլն է, Պելեից հետո նա էր ինձ համար երկրորդը ֆուտբոլում, ասել է Ռուսաստանի ֆուտբոլային միության առաջին փոխնախագահ, օլիմպիական չեմպիոն, «Արարատի», «Սպարտակի» նախկին գլխավոր մարզիչ Նիկիտա Սիմոնյանը:
«Կրոյֆը խաղացողի կարգավիճակում էլ խաղադաշտում մարզիչ եւ ղեկավար էր: Նա նետվում էր գրոհի եւ ժեստերով հուշում էր թիմակիցներին, թե ինչ դիրք գրավեն: Ողբերգական լուր է: Նրա հիշատակը լուսավոր է: Նա մեծագույնների շարքում էր՝ Պելե, Կրոյֆ, Մարադոնա, Դի Ստեֆանո, Պուշկաշ, Էյսեբիո: Եւ նա առաջիններից էր այդ ցուցակում»,- Նիկիտա Սիմոնյանի խոսքը մեջբերում է Rsport-ը:
Հիշեցնենք, որ մարտի 24-ին 68 տարեկանում թոքերի քաղցկեղից մահացած Կրոյֆը մինչեւ 44 տարեկան ակտիվ ծխող է եղել եւ ստիպված է թողել ծխելը միայն սրտի վիրահատությունից հետո:
Կրոյֆը «Ոսկե գնդակի» եռակի դափնեկիր է: Խաղացողի կարգավիճակում հանդես է եկել «Այաքսում», «Ֆեյենորդում», «Բարսելոնայում», «Լեւանտեում», «Լոս Անջելեսում» եւ «Վաշինգտոնում», դարձել է Հոլանդիայի 9-ակի չեմպիոն, Չեմպիոնների լիգայի եռյակի գավաթակիր, Իսպանիայի չեմպիոն: Հոլանդիայի հավաքականում անցկացրած 48 խաղում խփել է 33 գոլ, դարձել է 1974թ. աշխարհի փոխչեմպիոն, 1976թ. Եվրոպայի բրոնզե մեդալակիր:
Կրոյֆը եղել է «Բարսելոնայի», «Այաքսի» եւ Կատալոնիայի հավաքականի գլխավոր մարզիչը: 1988-1996 թվականներին նրա գլխավորությամբ «Բարսելոնան» նվաճել է 11 տիտղոս՝ Իսպանիայի չորս չեմպիոնություն, Իսպանիայի գավաթը, երեք անգամ սուպերգավաթը, Եվրոպական չեմպիոնների գավաթը, Եվրոպայի գավաթակիրների գավաթը:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.