Վարշամ Բորանյանը՝ Եվրոպայի չեմպիոն

20:35   13 մարտի, 2016

Վարշամ Բորանյանը հռչակվեց հունահռոմեական ըմբշամարտի Եվրոպայի չեմպիոն: 71 կգ քաշային կարգի եզրափակիչում Հայաստանի ներկայացուցիչը 3:0 հաշվով պարտության մատնեց սերբ Ալեքսանդար Մաքսիմովիչին:

Հիշեցնենք, որ Վարշամ Բորանյանն առաջին գոտեմարտում 8:0 հաշվով հաղթել էր ռումինացի Տոմի Կլաուդիո Հինովեանուին: 1/8 եզրափակիչում Բորանյանը նույն հաշվով շանս չտվեց պորտուգալացի Հուգո Միգել Դա Սիլվա Պասոսին: Քառորդ եզրափակիչում հայ ըմբիշի 8:2 հաշվով հաղթեց բուլղարացի Սվիլեն Պլամենով Կոստադինովին: Կիսաեզրափակիչում Բորանյանը դուրս թողեց հունգարացի Բալինտ Կորպասին:

Քիչ հետո բրոնզե մեդալի համար կգոտեմարտի Կարապետ Չալյանը: 75 կգ քաշային կարգում Չալյանը սփոփիչ գոտեմարտում 8:0 հաշվով հաղթել է Թուրքիայի ներկայացուցիչ Էմրա Սուլեյման Կուսին եւ մեդալի համար կգոտեմարտի ադրբեջանցի Էլվին Մուրսալիեւի հետ:

Կարապետ Չալյանը կիսաեզրափակիչի ուղեգրի համար գոտեմարտել էր վրացի Զուրաբի Դատունաշվիլիի հետ եւ պարտվել 0:8 հաշվով: Դատունաշվիլին դուրս է եկել եզրափակիչի, ինչի շնորհիվ հայ ըմբիշը շարունակում է պայքարը:

Որակավորման փուլում Չալյանը 7:6 հաշվով հաղթել էր գերմանացի Յան Ռոտերին, 1/8 եզրափակիչում 10:5 հաշվով ուժեղ էր բուլղարացի Իլիան Տոդորով Գեորգիեւից:

Հիշեցնենք, որ մարտի 12-ին Հայաստանը նվաճել էր 2 արծաթե մեդալ: 59 կգ քաշային Ռոման Ամոյանը եւ 98 կգ քաշային Արթուր Ալեքսանյանը հասել էին եզրափակիչ, որտեղ պարտվել էին: Եվրոպայի եռակի ու աշխարհի կրկնակի չեմպիոն Արթուր Ալեքսանյանին ոսկե մեդալ նվաճել թույլ չէր տվել ռուս Նիկիտա Մելնիկովը, իսկ 32-ամյա Ամոյանին ժամանակից շուտ 8:0 հաշվով հաղթել էր ռուսաստանցի Մինգիյան Սեմյոնովը:

Եվրոպայի առաջնության առաջին օրը Հայաստանի ներկայացուցիչներից պայքարի մեջ էին մտել նաեւ Միհրան Հարությունյանը (66 կգ) եւ Էդգար Խաչատրյանը (130 կգ), որոնք մեդալ չէին նվաճել: Մարտի 13-ին առանց մեդալի մնացին նաեւ Ռաֆայել Մանուկյանը (80 կգ) եւ Մաքսիմ Մանուկյանը (85 կգ):



© 2020 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։