ՖԻՖԱ-ն այսօր կունենա նոր նախագահ. Ֆավորիտները երկուսն են
11:50 26 փետրվարի, 2016ՖԻՖԱ-ի նախագահի արտահերթ ընտրությունում ԱՄՆ-ն եւ Ավստրալիան կքվեարկեն Հորդանանի արքայազն Ալի բին Ալ Հուսեյնի օգտին, հաղորդում է AFP-ն։ Քվեարկությունը փետրվարի 26-ին է Ցյուրիխում մեկնարկած ՖԻՖԱ-ի Կոնգրեսում, որի ուղիղ հեռարձակումը կլինի ՖԻՖԱ-ի կայքում։
ԿՕՆԿԱԿԱՖ-ն ի տարբերություն մյուս կոնֆեդերացիաների միասնական դիրքորոշմամբ հանդես չի գա։ Կանադան կքվեարկի ՈւԵՖԱ-ի գլխավոր քարտուղար Ջանի Ինֆանտինոյի օգտին։ Ասիայի եւ Աֆրիկայի գրեթե բոլոր ֆեդերացիաները նախապես հայտարարել են, որ աջակցելու են Ասիայի ֆուտբոլային կոնֆեդերացիայի նախագահ, շեյխ Սալման բին Իբրահիմ Ալ Խալիֆային։ Թեեւ Ինֆանտինոն հայտարարել էր, որ հույս ունի ստանալ աֆրիկյան ֆեդերացիաների գոնե կեսի աջակցությունը։
Քվեարկությանը կմասնակցեն 207 ֆեդերացիաներ։ Քուվեյթի եւ Ինդոնեզիայի անդամակցություը ՖԻՖԱ-ին ժամանակավորապես դադարեցված է, եւ այդ երկրների ֆեդերացիաները չեն քվեարկի։ Հայաստանի ֆուտբոլի ֆեդերացիան ՈւԵՖԱ-ի անդամ մյուս ֆեդերացիաների նման կքվեարկի Ինֆանտինոյի օգտին։
Քվեարկությունը գաղտնի է, առաջին փուլում հաղթելու համար անհրաժեշտ է հավաքել 2/3-ից ավելի ձայն։ Հաջորդ տուրերում նախագահ կընտրվի մինչեւ թեկնածուներից մեկը չստանա ձայների 50 տոկոսից ավելի։
Ֆավորիտներն են 50-ամյա շեյխ Սալման բին Իբրահիմ Ալ Խալիֆան եւ 45-ամյա Ջանի Ինֆանտինոն։ Անակնկալի սպասելիքներ կան նաեւ 39-ամյա Ալի բին Ալ Հուսեյնից, հատկապես, ԱՄՆ-ի աջակցությունը ստանալուց հետո։
Հայտնի է, որ հենց ԱՄՆ-ի իրավապահ մարմինների ակտիվ մասնակցությամբ սկսվեց ՖԻՖԱ-ի նախկին նախագահ Զեպ Բլատերի հետ կապված կոռուպցիոն սկանդալը։
ՖԻՖԱ-ի նախագահի թեկնածուներ են նաեւ 62-ամյա հարավաֆրիկացի գործարար, քաղաքական, հասարակական գործիչ Տոկիո Սեկսվալեն եւ 57-ամյա ֆրանսիացի Ժերոմ Շամպանը, որը եղել է Բլատերի խորհրդականը, ՖԻՖԱ-ի գլխավոր քարտուղարի տեղակալ, France Football-ի նախկին վերլուծաբան, Ֆրանսիայի դիվանագիտական գերատեսչության նախկին պաշտոնյա։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.