Իսպանիայի դատարանը եզրակացրել է, որ ֆուտբոլային խաղերին պետական հիմնի ժամանակ սուլելը չի կարող քրեորեն հետապնդվել, հաղորդում է mundodeportivo-ն:
2015թ. Իսպանիայի գավաթի խաղարկության եզրափակիչ հանդիպման ժամանակ «Բարսելոնայի» եւ Բիլբաոյի «Աթլետիկի» երկրպագուները սուլոցներով էին ընդունել Իսպանիայի հիմնի կատարումը: Բարսելոնայի «Կամպ Նոու» ստադիոնում կայացած հանդիպմանը ներկա էր եղել նաեւ Իսպանիայի թագավորը: «Բարսելոնան» հաղթել էր 3:1 հաշվով: Կատալոնիայի եւ Բասկերի երկրի բնակչության մեծամասնությունը կողմ է Իսպանիայից անկախանալուն:
Բռնության, ռասիզմի, այլատյացության եւ անհանդուրժողականության դեմ հանձնաժողովը միջադեպի կապակցությամբ փաստաթղթեր էր ներկայացրել Իսպանիայի գլխավոր դատախազություն եւ գործը հասել էր դատարան:
Սակայն Իսպանիայի Ազգային դատարանի դատավոր Ֆերնանդո Անդրեուն հայտարարել է, որ այդ միջադեպը չի կարող համարվել քրեական հանցագործություն, քանի որ այդպիսի գործողությունները պաշտպանված են խոսքի եւ կարծիքի արտահայտման ազատությամբ:
«Կարծիք արտահայտելու ազատությունը ժողովրդավարական սկզբունքների անկյունաքարն է»,- հայտարարել է դատավորը:
Իսպանիայում 2009 թվականին եւս նման միջադեպի գործով դատարանը չէր կայացրել մեղադրական դատավճիռ:
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։