Արթուր Աբրահամ. 7-րդ անգամ եմ արժանանում այս կոչմանը, բայց ամեն անգամ հուզվում եմ
17:40 4 փետրվարի, 2016Այս կոչումը ոչ միայն հաճելի է, այլեւ միաժամանակ պարտավորեցնող է` արդարացնել երկրպագուների սպասելիքները:
Այս մասին NEWS.am Sport-ի համար մեկնաբանությունում ասել է պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն Արթուր Աբրահամը:
«Ինձ համար մեծ պատիվ է BoxSport ամսագրի ժյուրիի եւ ընթերցողների քվեարկության արդյունքում հաղթել եւ արժանանալ «Գերմանիայի լավագույն բռնցքամարտիկ» կոչմանը: Շատ հաճելի էր, երբ իմացա այդ մասին: Թեեւ արդեն 7-րդ անգամն է, որ արժանանում եմ այս կոչմանը, այնուամենայնիվ, ամեն անգամ առանձնահատուկ հուզվում եմ: Իմ անսահման սերն ու խորին երախտագիտությունը՝ ժյուրիին, իմ մարտարվեստի երկրպագուներին, իմ մարզիչ Ուլի Վեգներին, «Զաուերլանդ իվենթ» փրոմոութերական կազմակերպությանը այս կոչման համար»,- նշել է հայ բռնցքամարտիկը:
Արթուր Աբրահամի մարզիչ Ուլի Վեգները ճանաչվել է տարվա լավագույն մարզիչ՝ այդ անվանակարգում հաղթելով 13-րդ անգամ:
Հիշեցնենք, որ Աբրահամը հաջորդ մենամարտն անցկացնելու է ապրիլի 9-ին Լաս Վեգասում, որտեղ մրցելու է 24-ամյա մեքսիկացի Ջիլբերտո Ռամիրեսի հետ: Արթուր Աբրահամը նախորդ անգամ ԱՄՆ-ում մենամարտել է 2012-ի մայիսի 14-ին՝ Կալիֆորնիայում պարտվելով ամերիկացի Անդրե Ուորդին: Նա նախորդ մենամարտն անցկացրել է 2015-ի նոյեմբերի 21-ին Գերմանիայի Հանովեր քաղաքում, որտեղ միավորներով հաղթել էր անգլիացի Մարտին Մարեյին:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.