Հենրիխ Մխիթարյանն անակնկալ է մատուցել երեխաներին (ֆոտո)
16:10 29 դեկտեմբերի, 2015Դորտմունդի «Բորուսիայի» եւ ֆուտբոլի Հայաստանի ազգային հավաքականի կիսապաշտպան Հենրիխ Մխիթարյանը դեկտեմբերի 29-ին անակնկալ այցելություն է կատարել «Զատիկ» երեխաների աջակցության կենտրոն: Մխիթարյանի այցելությունը մեծ խանդավառություն է առաջացրել երեխաների շրջանում, հայտնում է ՀՖՖ կայքը։
Մխիթարյանը սեղանի թենիս է խաղացել երեխաների հետ, լուսանկարվել գրեթե բոլորի հետ։ Երեխաները սկսել են վանկարկել Հենո, Հենո, Հայաստան, Հայաստան: Մինչեւ ֆուտբոլիստը ցանկացել է շնորհավորել Ամանորի եւ Սուրբ Ծննդյան տոների կապակցությամբ, երեխաներն արտասանել են Հայր Մերը, որին միացել է նաեւ Հենրիխը:
«Նախեւառաջ, ցանկանում եմ շնորհավորել բոլորիդ գալիք Ամանորի եւ Սուրբ Ծննդյան տոների կապակցությամբ: Մաղթում եմ, որ միշտ առողջ լինեք, լավ մարդ դառնաք, կյանքում ունենաք շատ հաջողություններ եւ ապագայում կազմեք լավ ընտանիք, որպեսզի ձեր նման գեղեցիկ երեխաներ ունենաք»,- երեխաներին դիմելով՝ ասել է Մխիթարյանը:
Այնուհետեւ Հենրիխ Մխիթարյանը բոլոր երեխաներին հանձնել է նվերներ, իսկ «Զատիկ» երեխաների աջակցության կենտրոնին՝ համակարգիչներ: Երեխաները խոստացել են անպայման ֆուտբոլ դիտել եւ խաղալ, իսկ ամենակարեւորը՝ շատ կարդալ այդ համագարգիչների օգնությամբ:
Վերջում երեխաները ներկայացրել են իրենց կողմից բեմադրված պարային համարներ: Ինչպես երեխաները, այնպես էլ կենտրոնի ղեկավարությունն ու անձնակազմը իրենց երախտագիտությունն են հայտնել Հենրիխ Մխիթարյանին:
© 2024 NEWS.am - Sport
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։