ՖԱՖ-ը կոչ է անում մասնակցել դեպի ՀՖՖ-ի շենք երթին
19:33 7 նոյեմբերի, 2015Ֆուտբոլի Հայաստանի ազգային հավաքականի երկրպագուների ֆան-ակումբ ՖԱՖ-ը («Առաջին ճակատ») հանդես է եկել պաշտոնական հայտարարությամբ։
«Հոկտեմբերի 16-ին ՖԱՖ-ը ներկայացրեց 3 պահանջ /երկրպագուների 3 ցանկություն/ ուղղված ՀՖՖ-ին՝ Հայաստանի հավաքականին վատագույն վիճակից դեպի լույսի կողմ տանող 3 քայլ: Հավաքականի մրցաշրջանի վերջին խաղից հետո մենք ակնկալում էինք հավաքականի ելույթների վերաբերյալ ՀՖՖ-ի նախագահի ամփոփիչ ասուլիս, որտեղ կխոսվեր նաեւ մեր պահանջների մասին, սակայն, մինչ օրս չկա որեւէ արձագանք:
Մինչեւ նոյեմբերի 16-ը ՀՖՖ-ի կողմից պատասխան չլինելու դեպքում ՖԱՖ-ը Արամ Խաչատրյանի արձանի մոտից կիրականացնի երկրպագուների երթ դեպի Խանջյան փողոց՝ Հայաստանի Ֆուտբոլի ֆեդերացիա՝ պատասխան իմանալու եւ տեր կանգնելու ներկայացված պահանջներին:
Սիրելիʹ երկրպագուներ, միʹ եղեք անտարբեր, միʹ բոյկոտեք ֆուտբոլը, միʹ եղեք հավաքականի կողքին միայն հաղթանակների ժամանակ: Սա յուրաքանչյուր հայ երկրպագուի հարցն է, ով գոնե մեկ անգամ ուրախացել է հավաքականով, ով ցանկանում է տեսնել ուժեղ հավաքական եւ ապրում է հավաքականով: Ազգային հավաքականը պատկանում է մեզ բոլորիս: Նոյեմբերի 16-ին կոչ ենք անում բոլոր երկրպագուներին մասնակցել մեր երթին դեպի ՀՖՖ: Պահանջելու ենք բարձրակարգ մարզիչ հավաքականի համար, տարբեր կոնֆլիկտների պատճառով ֆուտբոլիստներին չհրավիրելու հարցի վերանայում եւ ազգային հավաքականի խաղերի տոմսերի գների իջեցում:
Շարֆերով, եռագույններով, պաստառներով հավաքվում ենք նոյեմբերի 16-ին` ժամը 17:00-ին, Արամ Խաչատրյանի արձանի մոտ, երթը կմեկնարկի 18:00»,- նշվում է հայտարարությունում:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.