«Բորուսիայի» ղեկավար. Հենրիխ Մխիթարյանը, հավանաբար, չի մեկնի Ադրբեջան
01:14 19 հոկտեմբերի, 2015Դորտմունդի «Բորուսիայի» գործադիր տնօրեն Հանս-Յոահիմ Վացկեն պատմել է, որ Հայաստանի հավաքականի կիսապաշտպան Հենրիխ Մխիթարյանը, ամենայն հավանականությամբ, չի մեկնի ադրբեջանական «Գաբալայի» դեմ Եվրոպայի լիգայի երրորդ տուրի արտագնա խաղին, որը կկայանա հոկտեմբերի 22-ին Բաքվում:
«Մխիթարյանը, ամենայն հավանականությամբ, չի մեկնի «Գաբալայի» դեմ հանդիպմանը: Մենք ուսումնասիրել ենք իրավիճակը: Հայաստանի եւ Ադրբեջանի միջեւ կա կոնֆլիկտ, իսկ մենք պետք հոգ տանենք մեր ֆուտբոլիստների մասին:
Դժվարություններ կան անվտանգությունն ապահովելու հետ կապված: Եթե ֆուտբոլիստն իրեն հարմարավետ չզգա եւ ունենա վախի զգացում, ապա մենք, իհարկե, հաշվի կառնենք այդ հանգամանքները»,- Վացկեի խոսքը մեջբերում է Bild-ը:
Ավելի վաղ ադրբեջանական մամուլում լուրեր էին շրջանառվում, որ Հենրիխ Մխիթարյանը չի կարող ստանալ Ադրբեջանի մուտքի վիզա, քանի որ համարվում է այդ երկրի սահմանն ապօրինի հատած անձ, իսկ Բաքու այցելելու դեպքում, կարող է նույնիսկ ձերբակալվել։ 2011թ. դեկտեմբերին հայ ֆուտբոլիստն այցելել էր Արցախ եւ նվերներ հանձնել Ղարաբաղյան պատերազմի մասնակիցներին։
Ադրբեջանի ԱԳՆ մամուլի խոսնակ Հիկմեթ Գաջիեւն ավելի ուշ հայտարարել էր, որ ադրբեջանական կողմը չի խոչընդոտի Մխիթարյանի մասնակցությանը «Գաբալայի» դեմ խաղին:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.