Աշխարհի Գավաթ. Լեւոն Արոնյանը հաղթեց նաեւ սեւ ֆիգուրներով

Բաքվում մեկնարկած շախմատի աշխարհի գավաթի խաղարկության առաջին փուլում Հայաստանի ուժեղագույն գրոսմայստեր Լեւոն Արոնյանը 2:0 հաշվով վստահ հաղթանակ տարավ լյուքսեմբուրգցի Միխայել Վայդենկելերի նկատմամբ եւ դուրս եկավ 1/32 եզրափակիչ: Երկրորդ դասական պարտիայում Լեւոն Արոնյանը խաղաց սեւ ֆիգուրներով եւ մրցակցին ստիպեց հանձնվել 50-րդ քայլում:

Առաջին դասական պարտիայում Լեւոն Արոնյանը սպիտակներով եւս հաղթանակ էր տարել:

Երկրորդ փուլը կմեկնարկի սեպտեմբերի 14-ին: Արոնյանը կունենա հանգստի լրացուցիչ օրը: Սեպտեմբերի 13-ը առաջին փուլի թայ-բրեյքի օրն է:

Մրցաշարը նոկաուտ մրցակարգով է, պարտվողը դուրս է մնում պայքարից: Աշխարհի գավաթի խաղարկությունը կավարտվի հոկտեմբերի 5-ին: Մրցանակային հիմնադրամը 1,6 միլիոն դոլար է: