Հենրիխ Մխիթարյանը ներկա է լինելու Ռոբերտ Շտիգլիցի հետ իմ մենամարտին: Ուրախ կլինեի հյուրերի շարքում տեսնել նաեւ «Բորուսիայի» մյուս ֆուտբոլիստներին: Ես հաճույք եմ ստանում իմ եւ Շտիգլիցի իրար հաջորդող ռեւանշ մենամարտերից: Կանեմ հնարավորը` դիտարժան մրցելույթ եւ գեղեցիկ հաղթանակ ցուցադրելու համար:
Այս մասին NEWS.am Sport-ի թղթակցի հետ զրույցում ասաց հայ պրոֆեսիոնալ բռնցքամարտիկ, սուպերմիջին քաշային կարգում WBO վարկածով աշխարհի չեմպիոն Արթուր Աբրահամը:
Հուլիսի 18-ին Գերմանիայի Հալե քաղաքի Gerry Weber արենայում տեղի կունենա Արթուր Աբրահամ- Ռոբերտ Շտիգլից մենամարտը:
Աշխարհի գործող չեմպիոն Արթուր Աբրահամը եւ աշխարհի նախկին չեմպիոն Ռոբերտ Շտիգլիցը ռինգում արդեն հանդիպում են չորրորդ: Նախկին եւ ներկա չեմպիոններն առաջին անգամ հանդիպել են 2012թ. օգոստոսի 25-ին, Բեռլինի O2 World մարզապալատում: Այդ օրը Արթուր Աբրահամը, մրցավարների միաձայն որոշմամբ միավորների առավելությամբ հաղթեց` խլելով Շտիգլիցից աշխարհի չեմպիոնի տիտղոսը: Հետո Աբրահամը ռեւանշի հնարավորություն տվեց Շտիգլիցին, եւ կորցրեց տիտղոսը երկրորդ մենամարտի ժամանակ: Մենամարտը կայացավ 2013 թ. մարտի 23-ին Գերմանիայի Մագդեբուրգ քաղաքի Getec մարզահամալիրում: Այս մենամարտում Աբրահամը երրորդ ռաունդում աչքի վնասվածք ստացավ, բժիշկը դադարեցրեց մարտը եւ Շտիգլիցը հաղթեց տեխնիկական նոկաուտով: Բռնցքամարտիկների 3-րդ հանդիպումը կայացել է 2014 թ. մարտի 1-ին, Մագդեբուրգում, որտեղ դարձյալ միավորների առավելությամբ հաջողության հասավ Աբրահամը:
Արթուր, ինչպե՞ս ես տրամադրված մենամարտին:
Բոլոր մենամարտերին էլ լրջորեն եմ նախապատրաստվում: Ինչպես միշտ, մենամարտի գնալու եմ հաղթելու: Լավ մարզվել եմ, մարզիչս գոհ է իմ մարզավիճակից:
Փոլ Սմիթի հետ հաղթական մենամարտից հետո սպասվում էր, որ հաջորդ մրցակիցդ լինելու է Ֆելիքս Շտուրմը: Ինչպե՞ս որոշվեց, որ Ռոբերտ Շտիգլիցն է կրկին լինելու քո մրցակիցը:
Ռոբերտ Շտիգլիցը WBO չեմպիոնական գոտու պարտադիր հավակնորդ է, ահա թե ինչու հենց նա պետք է լիներ իմ առաջիկա մրցակիցը: Մեր մենեջերները պայմանավորվածության հասան:
Արթուր, տպավորություն է ստեղծվում, որ Ռոբերտ Շտիգլիցը չի հաշտվում այն մտքի հետ, որ աշխարհի չեմպիոնի գոտին քեզ է պատկանում, այդ պատճառով ռեւանշ մենամարտերը հաջորդում են միմյանց: Ի՞նչ ես կարծում, այս մենամարտով կավարտվի Շտիգլիցի պայքարը գոտու համար:
Ես հաճույք եմ ստանում մեր մենամարտերից, սակայն ամեն մի լավ բան էլ իր ավարտն ունի: Կարծում եմ, որ Հալեում ամեն ինչ կավարտվի Շտիգլիցի համար, ու ես կրկին կկարողանամ հաղթանակ տանել:
Երկու հաղթանակ, մեկ պարտություն Շտիգլիցի հետ մենամարտում: Ի՞նչ կանխատեսում եւ ակնկալիք ունես այս մենամարտից:
Միայն հաղթանակ, ուրիշ ոչինչ:
Դուք անցկացրել եք բաց մարզում Շտիգլիցի հետ: Ուսումնասիրե՞լ ես նրա տակտիկան: Փոփոխություններ նկատե՞լ ես:
Այո, նրա մարտավարությունն արդեն հիանալի գիտեմ:
Ռոբերտ Շտիգլիցը համոզված է, որ այս անգամ նրան կհաջողվի քեզանից խլել գոտին: Ի՞նչ հնարավորություններ ունի Ռոբերտ Շտիգլիցը:
Չունի նման հնարավորություն: Երբեք չեմ թերագնահատում Շտիգլիցին, եթե նա չեմպիոնական գոտու պարտադիր հավակնորդ է, ուրեմն հաստատ ուժեղ բռնցքամարտիկ է, սակայն նրան հաղթելու հնարավորություն չեմ տա:
Արթուր, նշել ես, որ Ռոբերտ Շտիգլիցը մահացու հարված չունի: Քեզ կհաջողվի՞ նոկաուտով ավարտել մենամարտը, թե՞ ցանկություն ունես մինչեւ վերջին ռաունդը նրան ապացուցել, որ դու ես ուժեղը:
Հիմա դժվար է ասել, թե կոնկրետ ինչպես կհաղթեմ, ամեն դեպքում, կանեմ հնարավորը` դիտարժան մրցելույթ եւ գեղեցիկ հաղթանակ ցուցադրելու համար: Կարդարացնեմ իմ մարտարվեստի երկրպագուների, իմ մարզիչի, ընկերների, բարեկամների, սիրելիների սպասելիքները:
Այս մենամարտի համար նոր տակտիկա, մարտավարություն մշակե՞լ եք մարզչիդ հետ:
Այո, արդեն ամեն ինչ հստակ որոշված, նախանշված է:
Քո հնարավորությունները որքա՞ն կգնահատես:
Բարձր: Ես եմ հաղթելու:
Դուք արդեն ունեցել եք նաեւ հայացքների մենամարտ: Ի՞նչ կարդացիր Շտիգլիցի հայացքում:
Հաղթելու ցանկություն: Բայց դա դեռ քիչ է հաղթելու համար:
Եթե Շտիգլիցին հաջողվի այս անգամ առավելության հասնել, հնարավո՞ր է 5-րդ ռեւանշ մենամարտ կայանա, թե, այնուամենայնիվ, չորրորդ մենամարտը ձեր վերջին հանդիպումը կլինի ռինգում:
Շտիգլիցին չի հաջողվի առավելության հասնել իմ նկատմամբ: Հետոյի մասին կխոսենք հետո:
Արթուր, դու երկարաձգել ես պայմանագիրդ Sauerland event պրոմոուտերական ընկերության հետ, ըստ որի` հանդես ես գալու մինչեւ 37 տարեկան: Նշանակում է պրոֆեսիոնալ բռնցքամարտիկի կարիերադ կավարտես 37 տարեկանո՞ւմ:
Գուցե, ամեն դեպքում, դեռ կշարունակեմ, մի երկու տարի էլ կմենամարտեմ, հստակ ոչինչ ասել չեմ կարող, թե երբ կավարտեմ կարիերաս:
Արթուր, դու վերջերս հանդիպել ես Դորտմունդի «Բորուսիայի» ֆուտբոլիստներին, Հենրիխ Մխիթարյանին: Հնարավո՞ր է՝ Աբրահամ - Շտիգլից ռեւանշ մենամարտի հյուրերի մեջ լինեն նաեւ «Բորուսիայի» ֆուտբոլիստները, Հենրիխ Մխիթարյանը:
Այո, Հենրիխ Մխիթարյանը գալու է: Ուրախ կլինեմ Դորտմունդի «Բորուսիայի» մյուս ֆուտբոլիստներին տեսնել արենայում: Սակայն ինքս էլ գիտեմ, թե ինչ գրաֆիկով են աշխատում մարզիկները, որքան զբաղված են:
NEWS.sm Sport-ը մաղթում է քեզ հաջողություն եւ հաղթանակ:
Նմանապես հաջողություն NEWS.sm Sport-ին եւ իմ բոլոր երկրպագուներին: Դուք ինձ քաջալերում եք եւ ստիպում հաղթել:
Լուսինե Շահբազյան
Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։