Մահացել է օլիմպիական փոխչեմպիոն Վարդան Միլիտոսյանը
13:15 30 ապրիլի, 2015Ծանր հիվանդությունից հետո ապրիլի 29-ի գիշերը մահացել է ԽՍՀՄ ծանրամարտի սպորտի վարպետ, վաստակավոր մարզիչ Վարդան Իշխանի Միլիտոսյանը:
Վարդան Միլիտոսյանը ծնվել է 1950-ի հուլիսի 8-ին Գյումրիում: Նա ծառայել է Խորհրդային բանակում, ավարտել է Գյումրու Մ. Նալբանդյանի անվան պետական մանկավարժական ինստիտուտը:
Վարդան Միլիտոսյանը զինծառայության ժամանակ 1964-ից մարզվել է ԽՍՀՄ անվանի ծանրորդ եւ մարզիչ Հակոբ Ֆարաջյանի գլխավորությամբ: Նա տպավորիչ հաղթանակներ է տարել միջազգային ամենահեղինակավոր մրցաշարերում: ԽՍՀՄ հավաքականի 75 կգ քաշային կարգի առաջատարը դարձել է Եվրոպայի կրկնակի չեմպիոն, օլիմպիական խաղերի արծաթե մեդալակիր (1976թ.), աշխարհի հնգակի ռեկորդակիր, տասնյակ հաղթանակներ է տարել համամիութենական առաջնություններում եւ միջազգային մրցաշարերում: Նրա շնորհիվ Հայաստանում դարձյալ վերսկսվել է ծանրամարտի վերելքը:
Սպորտին հրաժեշտ տալուց հետո Վարդան Միլիտոսյանը 1980-ին համալրել է հարազատ քաղաքի ծանրամարտի մասնագիտացված մարզադպրոցի մարզիչների շարքը, իսկ 1996-ին դարձել է տնօրենը: Նա իր հետքերով տարավ նաեւ եղբորորդուն՝ Իսրայել Միլիտոսյանին, ով դարձավ աշխարհի եւ Եվրոպայի բազմակի չեմպիոն, օլիմպիական խաղերի ոսկե եւ արծաթե մեդալակիր:
Հայաստանի ազգային օլիմպիական կոմիտեն ցավակցել է հանգուցյալի ընտանիքին, հարազատներին, նրա վարպետությամբ հիացած մարզասերների մեծ բանակին ու ընկերներին:
Վարդան Միլիտոսյանի հիշատակը միշտ վառ կմնա: Նրա անունը ոսկե տառերով է գրված հայրենական ու համաշխարհային սպորտի պատմության մեջ, փոխանցում է ՀԱՕԿ-ի մամուլի ծառայությունից:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.