ՖԻԴԵ-ն շախմատը ձմեռային Օլիմպիական խաղերում ընդգրկելու հայտ կներկայացնի
23:48 20 ապրիլի, 2015Շախմատի միջազգային ֆեդերացիայի նախագահ Կիրսան Իլյումժինովը Սոչիում հայտարարել է, որ կազմակերպությունը հայտ է ներկայացնում Միջազգային օլիմպիական կոմիտեին՝ շախմատը ձմեռային Օլիմպիական խաղերի ծրագրում ներառելու մասին։
«Այդ թեմայով զրուցել եմ ՄՕԿ-ի նախագահ Թոմաս Բախի հետ եւ պայմանավորվել ենք հունիսի 19-ին Լոզանում հանդիպելու մասին։ Մեր նախաձեռնությունը ստացել է ավելի քան 100 ազգային օլիմպիական կոմիտեների հավանությունը։ Անցած տարի այցելել եմ 108 երկիր։ Բանակցել եմ օլիմպիական կոմիտեների նախագահների եւ սպորտի նախարարների հետ։
Ձմեռային օլիմպիական խաղերի մրցումային օրերը բաժանվում են երկու մասի՝ առավոտյան եւ երեկոյան։ Առավոտյան ծրագիրն ավարտվում է 15։00-ին, իսկ երեկոյանը սկսվում է 19։00-ին։ Շախմատին կարելի է հատկացնել այդ արանքում ընկած ժամանակը։ Հատուկ մարզական կառույցների անհրաժեշտություն էլ չկա։ Բացի այդ, շատ երկրներ ներկայացված չեն ձմեռային մարզաձեւերում»,- Կիրսան Իլյումժինովի խոսքը մեջբերում է allsportinfo.ru-ն։
2014-ին ՄՕԿ-ը դադարեցրել էր շախմատը օլիմպիական մարզաձեւ դարձնելու քննարկումը, քանի որ կանոնադրությամբ՝ ձմեռային Խաղերի ծրագրում ներառված մարզաձեւի մրցումը պետք է անցկացվի ձյան կամ սառույցի վրա։
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.