Արթուր Աբրահամ. Հաղթանակս կնվիրեմ Հայոց ցեղասպանության 100-ամյա տարելիցին

Հաղթանակս կնվիրեմ Հայոց Ցեղասպանության 100-ամյա տարելիցին, ամբողջ հայ ազգին, իմ ընկերներին, բարեկամներին եւ NEWS.am-ին:

Այս մասին NEWS.am Sport-ի թղթակցի հետ զրույցում ասաց պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն Արթուր Աբրահամը Բեռլինում կայանալիք մենամարտից առաջ:

Փետրվարի 21-ին Բեռլինի O2 World մարզապալատում կկայանա Արթուր Աբրահամ - Փոլ Սմիթ ռեւանշ մենամարտը:

«Այսօր իմ ծննդյան օրն էր, բայց ես չեմ կարող ծնունդ նշել այս սրտով, մինչեւ չի կայացել իմ մենամարտը: Միայն հաղթանակից հետո կնշեմ ծնունդս: Ինձ մենամարտից առաջ ոչինչ չի հետաքրքրում:

Այս անգամ ես Փոլ Սմիթին ոչ մի հնարավորություն չեմ տա ռինգում: Նա խոսքերով է հայտարարում, թե ինձ կհաղթի: Թող խոսի, մենամարտի օրը ռինգում ամեն ինչ պարզ կլինի: Ես այնպիսի հաղթանակ կտանեմ, որ էլ երբեք նա չմտածի ռեւանշ մենամարտի մասին եւ ինձանից ռեւանշ չպահանջի:

Ես այսօր կշռման արարողության ընթացքում  հայացքների մենամարտի ժամանակ իմ հայացքով Սմիթին ասացի, որ ես միեւնույն է՝ հաղթելու եմ, հաղթանակը իմն է:

Փոլ  Սմիթին չեմ պատասխանի իր հայտարարությունների համար, խոսելը, ասելը շատ հեշտ է: Ես նրան ամեն ինչ ցույց կտամ ռինգում, հետո նոր կասեմ, կպատասխանեմ նրա հայտարարություններին, բայց միայն մենամարտից հետո:

Ռինգ գնալուց առաջ պարտության մասին չեմ մտածում, բայց չեմ բացառում, քանի որ սպորտ է եւ հնարավոր է վնասվածք ստանաս եւ պարտվես: Բայց ես երբեք պարտության մասին չեմ մտածում: Մենք մշակել ենք նոր մարտավարություն: Ես տեխնիկայով, հնարքներով պարտության կմատնեմ Սմիթին: Գտնվում եմ շատ լավ մարզավիճակում, շուրջ երեք ամիս մարզվել եմ, հավաքներ եմ անցկացրել, պատրաստվել եմ այս մենամարտին:

Այսօր փորձում եմ հանգստանալ, մտքերս միայն բռնքամարտի մասին են, ռինգում, մենամարտի մեջ: Ամբողջ օրը անջատել էի հեռախոսիս ձայնը, որպեսզի ոչ մեկի հետ չխոսեմ: Կարծում եմ՝ ինձ կներեն իմ բարեկամները, հարազատները եւ կհասկանան, որ ինձ համար այսօր եւ վաղը շատ կարեւոր օր է: Այս հաղթանակով ես իմ շնորհակալությունը կհայտնեմ բոլորին իմ ծննդյան օրը չմոռանալու, ինձ շնորհավորելու համար:

Այս հաղթանակս կնվիրեմ ամբողջ հայ ազգին, իմ ընտանիքին, NEWS.am-ին, որ Երեւանից եկել, հասել է այստեղ՝ իմ մենամարտը լուսաբանելու: Ես ազգի տղա եմ եւ իմ բոլոր հաղթանակները նվիրում եմ իմ ազգին: Երեւանյան ասուլիսներից մեկի ժամանակ էլ ասացի, որ առաջիկա մենամարտերիցս մեկը նվիրելու եմ Հայոց ցեղասպանության 100-ամյա տարելիցին: Սա լավ առիթ է հաղթանակս նվիրելու ցեղասպանության 100 ամյա տարելիցին, որպեսզի ամբողջ աշխարհը այս միջոցով եւս մեկ անգամ լսի եւ ճանաչի ցեղասպանությունը:

Արդեն 35 տարեկան եմ, մայրիկիս երազանքը թոռնիկ ունենալն է՝ այսինքն՝ իմ ամուսնությունը, երեխաներ ունենալը: Արդեն ժամանակ է, դեռ մի բան էլ անցել է ժամանակը, բայց ես այնքան եմ բռնցքամարտով տարված, որ չեմ հասցնում իմ անձնական կյանքով զբաղվել: Ամեն ինչ լինելու է, մնում է միայն կոնկրետացնել օրեր, ժամանակ, իրադարձություններ»,- ասաց Արթուր Աբրահամը:

Լուսինե Շահբազյան՝ Բեռլինից