Բեռնար Շալանդ. Խաղի արդյունքից զարմացած չեմ
22:20 14 հոկտեմբերի, 2014Արտյոմ Սիմոնյանի խաղից գոհ եմ: Նա դեռ շատ բան ունի ապացուցելու բարձր մակարդակում, բայց այսօր կարողացավ իրեն լավ դրսեւորել եւ ցուցադրել գրագետ ֆուտբոլ:
Այս մասին երեւանյան ընկերական խաղում ֆրանսիացիներից կրած պարտությունից հետո ասուլիսում նշեց ֆուտբոլի Հայաստանի հավաքականի գլխավոր մարզիչ Բեռնար Շալանդը, փոխանցում է NEWS.am Sport-ի թղթակիցը։
«Նախախաղային ասուլիսում նշել էի, որ մեզ շատ դժվար հանդիպում է սպասվում: Խաղի արդյունքից զարմացած չեմ, մեր ցուցադրած խաղի դեմ խոսք չունեմ ասելու տղաներին: Հպարտ եմ թիմի ցուցադրած խաղով: Մեր տղաները ցուցադրեցին լավ խաղ, նույնիսկ մի քանի գոլային պահ ունեցան: Այնպես որ չեմ դժգոհի մեր տղաների խաղից: Ես արդեն նշել էի, որ խաղալու ենք աշխարհի ուժեղագույն թիմերից մեկի դեմ:
Հիմնական դասը, որ ես քաղեցի այս երկու խաղերից, պաշտանությունում միասնական խաղ ցուցադրելն էր: Մենք հարձակման գծում ավելի լավ հնարավորություններ կունենանք, երբ մեզ միանան հիմնական կազմի խաղացողները, իսկ այժմ մեզ պետք է հստակեցնել խաղը պաշտպանությունում: Ես հասկացա, որ պաշտպանությունում մեր տղաները կարողանում են միասնական խաղ ցուցադրել:
Արտյոմ Սիմոնյանի խաղից գոհ եմ: Պաշտպանական գործողությունները եւ ընդհանուր նրա ցուցադրած խաղը տեխնիկապես շատ գրագետ էր: Արտյոմը շարունակում է հանդես գալ «Զենիթում» եւ դեռ շատ բան ունի ապացուցելու բարձր մակարդակում, բայց այսօր նա կարողացավ իրեն լավ դրսեւորել եւ ցուցարել գրագետ ֆուտբոլ:
Ինչ վերաբերում է Հովհաննես Համբարձումյանին, ես ունեի այլ խաղացողներ, որոնք կարող էին թարմացնել հարձակման գիծը, բայց կարեւոր էր նաեւ փակել աջ եզրը, որտեղից ֆրանսիացիներն ավելի շատ էին գրոհում: Հովհաննես Համբարձումյանը որոշակի առումով հարձակողական ոճի խաղացող է»,- նշեց Բեռնար Շալանդը:
Հիշեցնենք, որ Վազգեն Սարգսյանի անվան «Հանրապետական» ստադիոնում կայացած խաղում Ֆրանսիայի հավաքականը խփեց 3 անպատասխան գոլ: Մեկական անգամ աչքի ընկան Լոնդոնի «Չելսիի» նորեկ Լոիկ Ռեմին, «Մարսելի» հարձակվող Անդրե-Պյեր Ժինյակը եւ Մադրիդի «Աթլետիկոյի» կիսապաշտպան Անտուան Գրիզմանը: Այդ խաղում Հայաստանի հավաքականի մեկնարկային կազմում էր ռուսական «Զենիթի» 19-ամյա կիսապաշտպան Արտյոմ Սիմոնյանը, ով նորամուտը նշեց ազգային թիմում:
Լուսինե Շահբազյան
Ֆոտո՝ Արսեն Սարգսյան / NEWS.am Sport
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.