Արթուր Աբրահամը դարձյալ պաշտպանեց աշխարհի չեմպիոնի տիտղոսը (ֆոտոշարք)
02:24 28 սեպտեմբերի, 2014Պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն Արթուր Աբրահամը պաշտպանեց տիտղոսը: Այս անգամ հայ բռնցքամարտիկի մրցակիցն էր բրիտանացի Փոլ Սմիթը, ով դիմացավ մինչեւ վերջ: Գերմանիայի Կիլ քաղաքում անցկացված մենամարտում Աբրահամն առավելության հասավ մրցավարների միաձայն որոշմամբ՝ 117:111, 117:111, 119:109:
Աբրահամն ավելի ագրեսիվ էր մեկնարկում, բայց նրա առավելությունը նկատվեց երրորդ ռաունդում: Արթուրը շատ վստահ էր գործում պաշտպանվելիս: Հաջորդ մի քանի ռաունդներում եւս Աբրահամն անցկացրեց լավ գրոհներ, թեեւ մրցակիցը նույնպես ակտիվ էր: Մենամարտի երկրորդ կեսում էլ հայ բռնցքամարտիկի հարվածներն ավելի վտանգավոր էին ստացվում, սակայն Սմիթը դրանց պատասխանում էր հակագրոհներով եւ մի պահ հավասարեցրել էր մարտը: Բրիտանացին ակտիվությամբ չէր զիջում Աբրահամին, ով անշտապ քայլերով շարժվում էր առաջ: Վերջնամասում Արթուրի մոտ նկատվում էր հոգնածություն, իսկ բրիտանացու համառությունը արդյունք չտվեց եւ Աբրահամը հաղթանակով ավարտեց մենամարտը:
Գերմանիայի դրոշի ներքո հանդես եկող 34-ամյա Արթուր Աբրահամը երկրորդ անգամ պաշտպանեց գերմանացի Ռոբերտ Շտիգլիցից խլած տիտղոսը: Նախորդ մենամարտում նա մրցավարների միաձայն որոշմամբ հաղթել էր Չեռնոգորիան ներկայացնող Նիկոլա Սյեկլոցային: Սա Աբրահամի 41-րդ հաղթանակն էր պրոֆեսիոնալ ռինգում (28 նոկաուտ): Նա կրել է նաեւ 4 պարտություն:
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.