Արթուր Աբրահամ. Փոլ Սմիթին կպատասխանեմ իմ հաղթանակով (ֆոտո)

Ես արդեն Կիլ քաղաքում եմ, մարզվում եմ իմ գրաֆիկով եւ վստահ եմ, որ ամեն ինչ լավ է լինելու: Այս մասին NEWS.am Sport-ի թղթակցի հետ զրույցում ասաց պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոն Արթուր Աբրահամը:

Հիշեցնենք, որ սեպտեմբերի 27-ին Գերմանիայի Կիլ քաղաքում կկայանա պրոֆեսիոնալ բռնցքամարտի սուպերմիջին քաշային կարգում WBO վարկածով աշխարհի չեմպիոնական գոտու  պաշտպանության մենամարտը։ Արթուր Աբրահամը կմրցի բրիտանացի Փոլ Սմիթի հետ:

Արթուր, շուտով քո հերթական մենամարտն է, չեմպիոնական գոտու հերթական պաշտպանությունը: Ինչպե՞ս ես նախապատրաստվում մենամարտին, ինչպե՞ս անցկացրեցիր ամառը:

Այո, արդեն մի քանի օրից հերթական մենամարտս է: Այս մենամարտիս մարզումներին տրամադրել եմ երեք ամիս: Արդեն շուրջ երեք ամիս է ծանրաբեռնված ծրագրով մարզումների մեջ եմ: Մի քանի հավաքներ եմ արդեն անցկացրել: Մենամարտին տրամադրված եմ միայն դրական: Միայն թե այս ամռանը չհասցրեցի հանգստանալ, քանի որ պետք է նախապատրաստվեի մենամարտին, երկար ու ձիգ մարզումներով անցավ ամառս: Մի քանի օրով այստեղ-այնտեղ փորձեցի հանգստանալ, ծովի ափին հանգստանալ եւ վերջ: Եկա նաեւ Հայաստան, բայց այդ ամենն այնքան քիչ էր, որ չհասցրեցի նորմալ վայելել հանգիստս: Բայց հոգ չէ, այս մենամատից հետո կրկին կգամ Հայաստան եւ այդտեղ կհանգստանամ: Սովորաբար հանգիստս սիրում եմ ծովի ափին անցկացնել, լողալ, արեւի տակ հանգստանալ: Տարվա գերակշիռ մասը ես մրցումների մեջ եմ, մշտապես մարդաշատ վայրերում, շատ մարդկանց մեջ, եւ գալիս է ժամանակ, որ հանգստանալու, ամեն ինչից կտրվելու մեծ կարիք եմ զգում: Այդ ամենը վայելելու լավագույն տեղն ինձ համար ծովափն է:

Առաջիկա մենամարտը մեծ նշանակություն ունի ինձ համար։ Սա աշխարհի գոտու պաշտպանություն է, եւ ես պետք է ավելի կենտրոնացնեմ իմ ուժերը գոտին պահպանելու համար: Մենամարտը կայանալու է Գերմանիայի Կիլ քաղաքում: Ես արդեն այս քաղաքում եմ, մարզվում եմ իմ գրաֆիկով եւ վստահ եմ, որ ամեն ինչ լավ է լինելու:

Այս անգամ աշխարհի չեմպիոնի գոտին քեզանից ցանկանում է խլել բրիտանացի Փոլ Սմիթը, ով հայտարարել է, թե դու մնալու ես առանց չեմպիոնական տիտղոսի եւ որ նրան հաջողվելու է քեզանից խլել գոտին:

Խոսելը հեշտ է: Բոլորը լավ խոսում են: Եթե հավատայինք այդ խոսելուն, ուրեմն աշխարհի չեմպիոնի գոտին վաղուց արդեն պետք է լիներ Փոլ Սմիթի մոտ: Թող Փոլ Սմիթը խոսի, մենք էլ գործով կապացուցենք: Ես չեմ սիրում խոսել, ես սիրում եմ գործել: Այդ պատճառով ես այդ խոսքերին չեմ հետեւում, միայն ասում եմ՝ թող իմ մրցակիցը խոսի, ես էլ կգործեմ:

Ի՞նչ կասես մրցակցիդ մասին: Հետեւե՞լ ես նրա մենամարտերին եւ մշակե՞լ եք արդյոք մարզչիդ հետ նոր մարտավարություն:

Նա լավ բռնցքամարտիկ է, ունի հարձակողական ոճ: Նա կառուցվածքով «փոքրոտ» է, ճարպիկ ու այդ ամենի հաշվին շատ ուժեղ հարվածներ է հասցնում: Մարզիչիս հետ արդեն մշակել ենք տակտիկա, թե ինչպես պետք է մենամարտեմ, նրան տարածության վրա պահեմ, որ շատ չկարողանա մոտենալ:

Դու նշում ես, որ մրցակիցդ ուժեղ հարվածներ է հասցնում, այնինչ բրիտանացի բռնցքամարտիկը կարծիք է հայտնել, թե դու իրեն կթերագնահատես, ինչն էլ ինքը հենց ցանկանում է: Իրականում թերագնահատո՞ւմ ես դու մրցակցիդ, թե՞ ոչ:

Ես երբեք ոչ մեկին չեմ թերագնահատում՝ լինի դա պրոֆեսիոնալ բռնցքամարտիկ, թե՝ հասարակ մարդ: Որովհետեւ յուրաքանչյուր ոք՝ լինի մարզիկ, թե այլ բնագավառից, ամեն ինչի ընդունակ է, ամեն ինչ կարող է անել: Եթե Փոլ Սմիթը դուրս է գալու ռինգ եւ մրցում աշխարհի չեմպիոնի գոտու համար ու հասել է մինչ այս մենամարտը, ուրեմն նա ունի այդ պոտենցիալը եւ ուժը եւ համոզված է, որ կհաղթի:

Փոլ Սմիթը նաեւ հայտարարել է, որ մենամարտի ավարտին դու խիստ ցնցված կլինես, երբ հասկանաս, որ գոտին այլեւս քոնը չէ: Նրա այս ինքնավստահությունը քեզ չի մտահոգո՞ւմ:

Ոչ: Նա կարող է այդպես շարունակ ամպագոռգոռ խոսքեր ասել, հայտարարություններով հանդես գալ, ես այդ ամենին չեմ պատասխանի, մենամարտից հետո ես իմ պատասխանը կտամ իմ հաղթանակով: Ճիշտ կլինի, որ նա այդպես խոսի մենամարտից հետո եւ ոչ թե առաջ:

Արթուր, մրցակիցդ, կարծես, մեծ ագրեսիայով է լցված քո հանդեպ: Ինչո՞վ է դա պայմանավորված:

Փոլ Սմիթն առաջին մրցակիցս չէ, որ նման ագրեսիվ հայտարարություններով է հանդես գալիս, շատ եմ ունեցել մրցակիցներ, որ այդպես ագրեսիվ են խոսել իմ հետ մենամարտից առաջ: Յուրաքանչյուր մարդ մի ձեւի է, դա բնավորություն է, մեկը սիրում է խոսելով ինչ-որ բան ապացուցել, մեկ ուրիշը՝ գործելով: Փոլ Սմիթը խոսում է, ես էլ գործ եմ անում: Ես ռինգում ցույց կտամ Փոլ Սմիթին` որը որից հետո է:

Քո հնարավորությունները որքա՞ն ես գնահատում։ Ո՞րն է լինելու գերխնդիրը ռինգում:

Հաղթանակ, հաղթանակ ու միայն հաղթանակ, ուրիշ ոչինչ: Իսկ Փոլ Սմիթին որպես ուղերձ, կասեմ` շատ մի խոսիր, կխոսես մենամարտից հետո:

Արթուր, վերջին շրջանում Հայաստանի դրոշը մի քանի անգամ ծածանվեց միջազգային խոշոր մրցումներում՝ պատանեկան Օլիմպիական խաղեր, ըմբշամարտի աշխարհի առաջնություն: Հետեւո՞ւմ ես հայկական սպորտին, հաջողություններին:

Այո, տեղյակ եմ, ուրախ եմ, հետեւել եմ ըմբիշների գոտեմարտերին, շատ ուրախ եմ ու հպարտ մեր չեմպիոնների համար: Հատկապես, մեծ տպավորություն է թողել Արսեն Ջուլֆալակյանի գոտեմարտը ադրբեջանցու հետ: Տեսա, թե ինչպես ադրբեջանցուն տապալեց մեր չեմպիոնը: Շատ ուրախ եմ, աննկարագրելի հպարտություն եմ զգում: Փորձում եմ հետեւել բոլոր սպորտային իրադարձություններին, բնական է, որ ամեն ինչին չես կարող 100 տոկոսով հետեւել: Հայկական սպորտի իրադարձություններին հետեւում եմ ինտերնետով, մասնավորապես, NEWS.am Sport-ով:

Արթուր, վերջերս Հայաստանում էր Սյուզի Կենտիկյանը: Նա ասուլիսի ժամանակ նշեց, որ դու մեկ անգամ ասել ես, թե կանանց բռնցքամարտ չես սիրում: Այդպե՞ս է:

Ոչ, այդպես չէ: Ես բոլորին էլ սիրում եմ, ովքեր իրենց նախընտրած մարզաձեւում հաջողության են հասնում: Սյուզի Կենտիկյանին եւս շատ սիրում եմ որպես մարդ, ինձ համար նշանակություն չունի` նա բնռցքամարտիկ է, թե ծանրորդ: Կանանց բռնցքամարտը եւս սիրում եմ: Ո՞վ է ասել, թե չեմ սիրում: Նորմալ եմ ընդունում կանանց բռնցքամարտը, ուղղակի այն անհամեմատելի է տղամարդկանց բռնցքամարտի հետ: Դա նույնն է, ինչ համեմատության մեջ դնես կանանց ֆուտբոլն ու տղամարդկանց ֆուտբոլը:

Սյուզի Կենտիկյանի գործունեությանը հետեւում եմ եւ ուրախ եմ նրա հաջողությունների համար: Իրականում, ես աշխարհի բոլոր հայ մարզիկների եւ մարզուհիների սպորտային կարիերաներին հետեւում եմ, ինձ ամեն ինչ հետաքրքրում է աշխարհում սփռված հայ մարզիկների մասին:

Լուսինե Շահբազյան