NEWS.am Sport-ը ներկայացնում է. Օլիմպիական Զավեն Իգիթյան
20:43 15 օգոստոսի, 2014Զավեն Իգիթյան, հրաձգություն, օդամղիչ ատրճանակ:
Ծնվել է 1999 թվականին, Երեւանում: Անձնական մարզիչն է հայրը՝ Խորեն Իգիթյանը:
Նանջինգ-2014-ի 2-րդ պատանեկան օլիմպիական խաղերի ուղեգիր նվաճել է 2014թ. Եվրոպայի պատանիների առաջնությունում՝ դառնալով ոսկե մեդալակիր:
Ես՝ հրաձիգ
«Ես 15 տարեկան եմ, Եվրոպայի պատանիների առաջնության չեմպիոն: Հրաձգությունն ընտրել եմ հայրիկիս խորհրդով՝ գնալով նրա հետքերով: Հայրս Հայաստանի վաստակավոր մարզիչ է եւ առաջին անգամ նրա հետ եմ մուտք գործել հրաձգարան: Այդ ժամանակ դեռ 5 տարեկան էի եւ ոչինչ չէի հասկանում, միայն զգում էի, որ կրակելուց մեծ հաճույք եմ ստանում: Հայրս այդ տարիքից նկատեց իմ դիպուկությունը, եւ այդ օրվանից հրաձգարանը դարձավ իմ երկրորդ տունը: Սիրում եմ կրակել, դա գերագույն հաճույք է: Հրաձգությունը կոփում է մարդուն թե ֆիզիկապես, թե հոգեպես: Ամենակարեւորը հոգեբանական պահն է: Եթե հոգեպես լինում ես ներդաշնակ մտքերիդ հետ, ապա դու կարող ես կրակել՝ այն էլ ուղիղ նշանակետին: Հրաձգությունը մարդուն սովորեցնում է ղեկավարել սեփական հույզերը, ներքուստ լինել հանգիստ, ստիպել սրտին աշխատել հանգիստ, չնյարդայնանալ: Սա ինձ համար մեծ դպրոց է հետագայում կյանքի այլ ոլորտներում ցանկացած հարցերի ավելի զգոն եւ սառը ուղեղով դատելու համար: Սիրում եմ կրակել, այն ասես իմը լինի: Սիրում եմ զենքը, զենքի տիրապետելը, դա իսկական տղամարդու գործ է: Ես ուրախ եմ, որ ընտրել եմ հրաձգությունը»:
Ես՝ պատանեկան Օլիմպիական խաղերի մասնակից:
«Ինձ համար շատ կարեւոր են այս Խաղերը: Եվրոպայի առաջնությունից հետո, սա իմ ամենաբարձր մրաշարն է լինելու: Կարծում եմ՝ յուրաքանչյուր մարզիկ երազում է մեկ անգամ գոնե հնարավորություն ունենալ ուժերը փորձել Օլիմպիական խաղերում: Ես կփորձեմ օգտագործել այս հնարավորությունը: Կարեւոր քայլ է պատանիների տարիքային խմբում եւ իմ մարզական կարիերայի սկզբում: Ուրախ եմ, որ ինձ հաջողվել է ձեռք բերել այդ ուղեգիրը, դա ինձ համար լավագույն նվերն էր իմ մարզական կարիերայի նախաշեմին:
Երազում եմ դառնալ պատանեկան Օլիմպիական խաղերի չեմպիոն: Նախ եւ առաջ, դա կլինի ամենամեծ պարգեւը եւ շնորհակալությունը հայրիկիս, ով ինձ ուղղորդել է այս մարզաձեւում: Կիրականացնեմ նրա երազանքը եւ կարդարացնեմ նրա եւ մյուս մարզիչների եւ ընկերներիս սպասելիքները: Գիտեմ, որ բոլորը հավատում են իմ հաջողությանը, այնպես, ինչպես հավատում էին Եվրոպայի պատանեկան առաջնությունում: Հաղթանակս կնվիրեմ հայրիկիս»:
Ակնկալիքներս
«Հոգուս խորքում հավատում եմ, որ սպորտային հաջողությունն ինձ կժպտա օլիմպիական մրցասպարեզում: Տրամադրված եմ մեդալ նվաճելուն: Հուսամ՝ կկարողանամ հետ թողնել բոլոր մրցակիցներիս: Ցանկանում եմ Եվրոպայի պատանեկան առաջնությունում գրանցածս հաջողությունը կրկնել: Հոգեբանորեն տրամադրվել եմ մեդալի, մասնավորապես, ոսկե մեդալի, հավատում եմ ինքս ինձ եւ իմ ուժերին: Եթե կարողացել եմ Եվրոպայի պատանիների մեջ լինել ուժեղագույնը եւ բոլորին հետ թողնել, կարծում եմ՝ կկարողանամ նաեւ նույնն անել պատանեկան Օլիմպիական խաղերում»:
Զավեն Իգիթյանը օլիմպիական կրակագիծ դուրս կգա օգոստոսի 18-ին:
Լուսինե Շահբազյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.