NEWS.am Sport-ը ներկայացնում է. Օլիմպիական Վիգեն Խաչատրյան
14:27 14 օգոստոսի, 2014NEWS.am Sport-ը ներկայացնում է օգոստոսի 16-ին Չինաստանի Նանջինգ քաղաքում մեկնարկող 2-րդ պատանեկան օլիմպիական խաղերում Հայաստանի օլիմպիականներին:
Վիգեն Խաչատրյան, սպորտային մարմնամարզություն
Ծնվել է 1996 թվականին, Երեւանում: Անձնական մարզիչն է Արտյոմ Ավետյանը:
Նանջինգ-2014 պատանեկան օլիմպիական խաղերի ուղեգիր նվաճել է՝ սպորտային մարմնամարզության Եվրոպայի երիտասարդական առաջնության բազմամարտի մրցաշարում գրավելով 6-րդ տեղը:
Ես` մարմնամարզիկ
«Մարմնամարզությունն իմ կյանքն է` մարզադահլիճը, ամենօրյա մարզումները, դժվարությունները, մրցաշարերը, հաղթանակները, պարտությունները, արդյունքիցս գոհ կամ դժգոհ մարզիչներս, նրանց հետ զրույցները, մեր ընդհանուր ծրագրերը, նպատակները: Չեմ կարող ասել, թե առաջին օրից սիրել եմ այս մարզաձեւը, քանի որ շատ փոքր եմ եղել եւ ավելի շատ որպես խաղ եմ ընկալել այս մարզումները: Հետագայում արդեն, երբ սկսեցի պրոֆեսիոնալ զբաղվել, մրցումների մասնակցել, աստիճանաբար լրջացավ ամեն ինչ, եւ ես դարձրեցի այն իմ կյանքի մեծ մասը»:
Արտյոմ Ավետյան, Վիգեն Խաչատրյան
Ես` պատանեկան Օլիմպիական խաղերի մասնակից
«Իմ մարզական կարիերայում սա իմ առաջին ամենալուրջ եւ ամենակարեւոր մրցաշարն է, իմ առաջին Օլիմպիական խաղերը: Ուրախ եմ, որ կարողացել եմ նվաճել պատանեկան Օլիմպիական խաղերի ուղեգիրը : Սա ինձ համար մեծ ձեռքբերում է: Մեկնում եմ Նանջինգ Հայաստանի, հայ պատանի մարմնամարզիկների անունը բարձր պահելու, մրցանակային տեղեր զբաղեցնելու համար: Յուրաքանչյուր մարզիկի համար, լինի նա պատանի, երիտասարդ, թե արդեն մեծահասակ, Օլիմպիական խաղերը յուրաքանչյուրիս համար կան եւ մնում են ամենաբարձր կետը, որին պետք է հասնել: Ես ուրախ եմ, որ դա ինձ հաջողվեց պատանեկան տարիքում, այդպես կփորձեմ շարունակել մինչեւ մեծահասակների Օլիմպիական խաղերը»:
Ակնկալիքներ
«Գտնվում եմ լավ մարզավիճակում: Չեմ ասում, թե ես մեդալ կբերեմ, մինչեւ ելույթի դուրս չգամ, մարզիչներիս դրած խնդիրը լիարժեք չկատարեմ, չեմ հայտարարի երբեք նախապես, որ ես մեդալով կվերադառնամ Օլիմպիական խաղերից: Բայց խոստանում եմ, որ լավ ելույթ կցուցադրեմ եւ կկատարեմ իմ առջեւ դրված խնդիրը: Մնացածը` ինչպես Աստված կկամենա»:
Վիգեն Խաչատրյանը մրցահարթակ դուրս կգա օգոստոսի 17-ին:
Լուսինե Շահբազյան
Ֆոտո՝ Շուշանիկ Հակոբյան
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.