Էջմիածին. Գոհար Շահնազարյանը նվաճեց Բաքվում կայանալիք Եվրոպական ամառային խաղերի ուղեգիր (ֆոտո)

13:55   24 հուլիսի, 2014

«Արա եւ Այծեմնիկ» մարզական ակումբում շարունակվում է հուլիսի 21-ին մեկնարկած նետաձգության Եվրոպայի առաջնությունը: Մրցումների չորրորդ օրն է:

Պայքարում մնացած Հայաստանի հավաքականի միակ նետաձիգ Գոհար Շահնազարյանը 1/24-ում ուժերը չափեց իսպանուհի Ալիսյա Մարինի հետ: Հայ մարզուհուն չհաջողվեց առավելության հասնել մրցակցուհու նկատմամբ. նա պարտվեց 0:6 հաշվով:

Գոհար Շահնազարյանը շարունակեց պայքարը 2015-ին Բաքվում կայանալիք Եվրոպական խաղերի ուղեգիր նվաճելու համար: Հայ մարզուհին պարտվեց, այս անգամ Շվեյցարիան ներկայացնող Կիանա Դայնեկոյին՝ 2:6, սակայն այս հաշիվը թույլ տվեց հայ մարզուհուն ուղեգիր նվաճել:

Օլիմպիական աղեղներով տղամարդկանց մրցումների եզրափակիչում կհանդիպեն գերմանացի Կահլուդ Ֆլորիանը եւ բելառուս Անտոն Պրիլեպովը, բրոնզե մեդալի համար կպայքարեն իտալացի Մաուրո Նեսպոլին եւ ֆրանսիացի Պյեր Պիլոնը: Կանանց պայքարում ոսկե մեդալը կվիճարկեն լեհ Նատալյա Լեստնյակն ու ռուս Տատյանա Սեգինան, իսկ բրոնզե մեդալը՝ իսպանուհի Ալիսիա Մարինը եւ ռուս Ինա Ստեպնովան:

Ոչ օլիմպիական աղեղներով տղամարդկանց եզրափակիչում կհանդիպեն հոլանդացի Պետեր Էլզինգան եւ Սերխիո Պագնին, իսկ երրորդ տեղի համար կպայքարեն Սեբաստիան Պեյնեուն եւ Դունկան Բուսբին: Կանանց մրցաշարի եզրափակիչում կհանդիպեն Ռուսաստանը ներկայացնող Սվետլանա Չերկաշնեւան եւ իտալացի Լաուրա Լոնգոն, բրոնզը կվիճարկեն դանիացի Սարա Հոլսթ Սոնիչսենը եւ գերմանացի Ջանին Մեյնսները:

Անհատական առաջնության եզրափակիչ հանդիպումները կկայանան հուլիսի 26-ին:

Շուշանիկ Հակոբյան

Ֆոտո՝ NEWS.am Sport



© 2024 NEWS.am - Sport

Սույն կայքում տեղ գտած լրատվական հրապարակումների հեղինակային իրավունքը պատկանում է բացառապես NEWS.am լրատվական-վերլուծական գործակալությանը։Սույն կայքի բոլոր լրատվական հրապարակումները անհատական օգտագործման համար են։ Տեղեկատվություն տարածող այլ միջոցներում սույն կայքի հրապարակումների (մասնակի կամ ամբողջական) վերահրապարկման համար անհրաժեշտ է NEWS.am լրատվական-վերլուծական գործակալության գրավոր թույլտվությունը։Խախտում թույլ տված անձինք կենթարկվեն պատասխանատվության օրենքով սահմանված կարգով։