Էջմիածնում մեկնարկեց նետաձգության Եվրոպայի առաջնությունը (ֆոտո)
19:02 21 հուլիսի, 2014Էջմիածին քաղաքի «Արա եւ Այծեմնիկ» ձիասպորտի ակումբում հուլիսի 21-ին մեկնարկեց նետաձգության Եվրոպայի առաջնությունը:
Եվրոպայի առաջնությանը մասնակցում է 372 մարզիկ 39 երկրից, այդ թվում՝ Թուրքիայից եւ Ադրբեջանից: Եվրոպայի առաջնության բացման արարողությանը ներկա էին ՀՀ նախագահ Սերժ Սարգսյանը, Երեւանի քաղաքապետ Տարոն Մարգարյանը, ՀՀ ՊՆ նախարար Սեյրան Օհանյանը, Նետաձգության Եվրոպայի ֆեդերացիայի նախագահը։ Եվրոպայի առաջնությունը կանցկացվի հուլիսի 21-ից 26-ը: Մարզիկների թվում են Օլիմպիական խաղերի, աշխարհի եւ Եվրոպայի առաջնությունների չեմպիոններ: Բացման արարողությունը մեկնարկեց մասնակից երկրների մարզիկների հանդիսավոր շքերթով, որը եզրափակվեց Հայաստանի հավաքականը:
Եվրոպայի նետաձգության ֆեդերացիայի նախագահ Մարիո Սկարցելան իր ողջույնի խոսքում ասաց.
«Ուրախ եմ, որ Եվրոպայի նետաձգության 21-րդ առաջնությունը անցկացվում է Հայաստանում, որն արդեն հաջողությամբ հյուրընկալել է Եվրոպայի Գրան Պրին եւ Եվրոպայի պատանեկան Գավաթը: Վստահ եմ, որ նախորդ առաջնությունների կազմակերպչական փորձից ելնելով, փայլուն կանցկացվի Եվրոպայի նետաձգության այս կարեւորագույն միջոցառումը: Անկեղծ ցանկանում եմ շնորհակալությունս հայտնել Հայաստանի նետաձգության ֆեդերացիայի նախագահ Նազիկ Ամիրյանին՝ ջերմ ընդունելության համար:
2014 թվականի Եվրոպայի առաջնությունը կարեւոր նշանակություն ունի բոլոր մարզիկների համար, քանի որ վարկանիշային է Եվրոպական խաղերից առաջ: Բացի այդ, այս առաջնությունը լավ փորձություն է եվրոպական մի շարք պատվիրակությունների համար, որոնք վարկանիշային միավորներ են հավաքում 2016 թվականի Օլիմպիական խաղերի համար: Վստահ եմ, որ այստեղ ականատես կլինենք բարձր մակարդակով կազմակերպված հրաշալի մրցումների: Եվ վերջում ցանկանում եմ շնորհակալություն հայտնել հայաստանյան կազմակերպություններին այս միջազգային խոշոր միջոցառումը հյուրընկալելու եւ մասնակից երկրների պատվիրակություններին լավագույնս ընդունելու համար:Բոլոր մրցավարներին մաղթում եմ լավ աշխատանք, մարզիկներին՝ հաջողություն»։
Լուսինե Շահբազյան
(Ֆոտո՝ Արսեն Սարգսյան)
© 2026 NEWS.am - Sport
The copyright for information published on this web site is owned exclusively by Armenian News-NEWS.am information-analytical agency. All information materials published on this website are intended solely for personal use. For full or partial reproduction of any material in other media it is required to acquire written permission from Armenian News-NEWS.am information-analytical agency. Those, who have committed copyright violations, will be prosecuted accordingly.